ތިން އަހަރުވީއިރުވެސް، ކުރީ ސަރުކާރޭ ކިޔުން އަދިވެސް ހުއްޓާކަށް ނުވޭތޯ ވިދާޅުވެ އަލީ އާޒިމް އަށް ޝިޔާމް ސުވާލުކުރައްވައިފިއެވެ.
ކަރަންޓް ބިލް ބޮޑުވަނީ ކުރީ ސަރުކާރުން ކަންކޮށްފައިވާ ގޮތުން ކަމަށް އަލީ އާޒިމު ވިދާޅުވުމާއި ގުޅިގެން ނައިފަރު ދާއިރާގެ މެމްބަރު އަހުމަދު ޝިޔާމް ކުރެއްވި ޓުވީޓެއްގައި ވިދާޅުވީ، ހުރިހާ ބާރަކާ އެކީ 3 އަހަރުވީމާވެސް ކުރީ ސަރުކާރޭ ވިދާޅުވާން ފެށުމުން ރައްޔިތުންނަށް އެކަން ވާނީ ޖޯކަކަށް ކަމަށެވެ. އަދި ކަންޕަންޕުޅަށް އަޑު ގެންދަން ކޮންމެ ފަހަރަކު ރައްޔިތުން މިޖެހެނީ އޮބި އަޅަން ކަމަށެވެ. ޝިޔާމް ވިދާޅުވީ، ދައުރު ނިމުމުގެ ކުރިން ރައްޔިތަކަށް ހިދުމަތް ކޮށްދިނުން މާ އައުލާކަން ބޮޑު ކަމަށް ޝިޔާމް ވިދާޅުވިއެވެ.
މިދިޔަ މަހުގެ ކަރަންޓް ބިލް ބޮޑުވުމުގެ ސަބަބުން ބައެއް ރައްޔިތުން ކަންބޮޑުވުން ފާޅު ކުރަމުންދާތީ މާލޭގެ މޭޔަރ ޑރ މުހައްމަދު މުއިއްޒު ކުރެއްވި ޓުވީޓަކަށް އިޝާރާތް ކުރައްވާ އަލީ އާޒިމް ކުރެއްވި ޓުވީޓެއްގައި ވިދާޅުވީ، މިއަދު މިޖެހޭ އުނދަގުލާ، ތަކުލީފަކީ އިއްޔެ ކަންކުރިގޮތުން ވާގޮތެއް ކަމަށެވެ. އަދި އެކަން އެގޮތައް ދިމާމިވަނީ ޑރ މުއިއްޒު އިންނެވި ކެބިނެޓަކުން ދެކޮޅުނުޖެހޭ އިގްތިސާދީ ގިނަ ނިންމުންތަކެއް ނިންމުމުގެ ސަބަބުން ކަމަށް އާޒިމް ވިދަޅުވެފައިވެއެވެ.
