އިންޓަރނެޓްގެ ކަންބޮޑުވުންތަކާއި ޝަކުވާތައް ހުށަހެޅުމަށް ހޮޓްލައިނެއް ގާއިމުކޮށްފިއެވެ.
ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން ކުރިއަށްގެންދާ އިންޓަރނެޓް ހެޔޮކުރުން މި މަޝްރޫއުގެ ދަށުން ރާއްޖޭގައި ދެމުންގެންދާ އިންޓަރނެޓްގެ ހިދުމަތާމެދު އެއްވެސް ރައްޔިތެއްގެ އެއްވެސް ޝަކުވާއެއް އޮތްނަމަ 1515އަށް މިހާރު ގުޅާ ޝަކުވާ ހިއްސާ ކުރުމަށް މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީން ވަނީ އެދިފައެވެ.
1515 ހޮޓްލައިން ގާއިމުކޮށްފައިވަނީ މުާސަލާތީ ހިދުމަތުގެ ތެރޭގައި ހިމެނޭ ރާއްޖޭގައި މުޢާސަލާތީ ހިދުމަތްދިނުމަށް ހުއްދަ ދީވިފައިވާ ފަރާތްތަކުން ފޯރުކޮށްދެމުންދާ ހިދުމަތްތަކާގުޅޭގޮތުން ކޮމިއުނިކޭޝަން އޮތޯރިޓީއާއި ހިއްސާކުރަން ބޭނުންވާކަމެއް އޮތްނަމަ، އެކަމެއް ހުށަހެޅުމަށްކަމަށްވެސް އެ މިނިސްޓްރީން ހާމަކުރެއެވެ.
އަދި އިންޓަރނެޓްގެ އިތުރުންވެސް މި ހޮޓްލައިން މެދުވެރިކޮށް ކޮމިއުނިކޭޝަން އޮތޯރިޓީއާ ގުޅުންހުރި ކަންކަމާބެހޭ މަޢުލޫމާތު ހިއްސާކޮށް ކަންކަން އޮޅުންފިލުވޭނެކަމަށްވެސް އެ މިނިސްޓްރީން ހާމަކުރެއެވެ.
ނެޓް ހެޔޮ ކުރުމަކީ ރައީސް ސާލިހުގެ ރިޔާސީ ވައުދުފުޅެކެވެ. ނަމަވެސް މިއަދާ ހަމައަށްވެސް މިކަމަށް ހައްލެއް އައިސްފައިނުވާތީ ގިނަ އާއްމު ރައްޔިތުން ދަނީ ސަރުކާރަށް ފާޑު ކިޔަމުންނެވެ. ރާއްޖެ އަކީ މި ސަރަހައްދަށް ބެލި ނަމަވެސް އިންޓަރނެޓް އެންމެ އަގުބޮޑު އެއް ގައުމުކަން ފާހަގަކުރެވެއެވެ.
