ކުރީގެ ރައީސް އަދި އިދިކޮޅު ސިޔާސީ ލީޑަރު އަބްދުﷲ ޔާމީން އިންސާފުން ބޭރުން ފުލުފުލުގައި ޝަރީއަތަށް ގެންދިޔަކަމުގައި ވިޔަސް ރައީސް އިބްރާހިމް މުހައްމަދު ސޯލިހަށާއި އެމްޑީޕީއަށް ތާއީދު އިތުރު ނުވާނެ ކަމަށް ވިދާޅުވެ، ފަރެސްމާތޮޑާ ދާއިރާގެ މަޖިލިސް މެމްބަރު ހުސައިން މުހައްމަދު ލަތީފު (ސެމްބެ) ސަރުކާރަށް ފާޑު ވިދާޅުވެއްޖެ އެވެ.
ސެމްބެގެ ސަރުކާރަށް ފާޑު ވިދާޅުވެފައި މިވަނީ ނޫސްވެރިޔާ އަހުމަދު ރިލްވާނުގެ މައްސަލައިގައި ރައީސް ޔާމީން މަރު ކޮމިޝަނަށް ހާޒިރު ކުރަން އަންގާފައިވާތީ އެކަމާއި ގުޅިގެންނެވެ.
އެގޮތުން ސެމްބެ ވިދާޅުވީ މިސަރުކާރުގެ މެނިފެސްޓޯގެ މަތިން ހަނދާން ނެތި ކޯލިޝަންއާއިއެކު ބަގުޑި ބެއްދިކަމުގައި ވިޔަސް އިތުރަށް ލިބޭނެ ވެރިކަމެއް ދެން ނެތް ކަމަށެވެ. ސެމްބެ މިފަދައިން ވިދާޅުވެފައި މިވަނީ ރައީސް ޔާމީންގެ މައްޗަށް ކުރާ ކޮރަޕްޝަންގެ ދެ ދައުވާއެއްގެ އަޑުއެހުމަށް އިއްޔެ ކޯޓަށް ހާޒިރު ކޮށްފައި އޮއްވާ އެވެ. އެމަނިކުފާނު މަރު ކޮމިޝަނަށް ހާޒިރު ކުރަން އަންގާފައިވަނީ އިއްޔެ އެވެ.
ސެމްބެ އިތުރަށް ވިދާޅުވީ ބަރެއް ލިބުމުން ރައީސް ޔާމީނަށް ހިތު ހުރިގޮތެއް ހަދާފައި މާދަމާ ހަަމަ ނޭވާ ލެވޭނެ ކަމަށް މި ސަރުކާރުގެ ބައިވެރިން ދުވަހަކުވެސް ހީކޮށްގެން ނުވާނެ ކަމަށެވެ. އަދި ގައުމަށް ހަމަޖެހުމެއް އޮތީ ގާނޫނީ އިމުގެ ތެރެއިން މި ސަރުކާރު ބޭރުކޮށްގެން ކަމަށްވެސް އޭނާ ވިދާޅުވި އެވެ.
ނޫސްވެރިޔާ ރިލްވާނުގެ މައްސަލައާއި ރައީސް ޔާމީނާއި އެއްވެސް ގުޅުމެއް ނެތްކަމަށާއި އެ މައްސަލައިގައި އެމަނިކުފާނުގެ މައްޗަށް ދައުވާއެއް ކުރެވިދާނެކަމަށް ގަބޫލު ނުކުރެއްވޭކަމަށް މަރު ކޮމިޝަންގެ ކުރީގެ ރައީސް ހުސްނުއް ސުއޫދު ވިދާޅުވެފައިވާތީ އެކަން ސެމްބެ ވަނީ ފާހަގަކުރައްވައިފަ އެވެ.
އެއާއެކު ވިދާޅުވީ ކުއްލިއަކަށް ރިލްވާނުގެ މައްސަލައިގައި ރައީސް ޔާމީން ހާޒިރު ކުރަން ނިންމުމުން އިތުރަށް ސަރުކާރުގެ ނާގާބިލު ކަމާއި މުއައްސަސާތަކަށް ނުފޫޒު ފޯރުވާ މިންވަރު ވަރަށް ބޮޑަށް ހާމަވެގެން ދާކަމަށެވެ.
"ރައީސް ޔާމީނަށް ދެވޭ އަނިޔާތަކަކީ މުޅި ގައުމަށް ދެވޭ އަނިޔާއެއް. ގައުމުގައި ސުލްހަ މަސަލަސްކަން ގާއިމް ކުރުމަށް މިއަދުގެ ކޯލިޝަން ވެރިން ބޭނުންވާނަމަ އަނިޔާވެރިކަން ހުއްޓައިލަން ގޮވާލަން"
- ހުސައިން މުހައްމަދު ލަތީފު
މި ސަރުކާރުން ރައީސް ޔާމީން ތަހުގީގުތަކަށް ހާޒިރު ކުރަމުން ދާއިރު ރައީސް އިބްރާހިމް މުހައްމަދު ސޯލިހާއި ވަރަށް ބޮޑަށް ހިޔާލު ތަފާތުވުން އުފެދި ސިޔާސީ ގޮތުން އެމަނިކުފާނާއިއެކު ހުންނެވެން ނެތްކަަމަށް ވިދާޅުވި އެމްޑީޕީގެ ރައީސް އަދި މަޖިލިސް ރައީސް މުހައްމަދު ނަޝީދު ވަނީ ރައީސް ޔާމީންގެ އެހީތެރިކަމަށް އެދިލައްވާނެ ކަމަށް ވިދާޅުވެފަ އެވެ. އަދި އެމްޑީޕީން، އިދިކޮޅު ޕީޕީއެމްއާއެކު ކޯލިޝަނެއް ހަދަން ޖެހޭކަމަށްވެސް ރައީސް ނަޝީދު ވިދާޅުވި އެވެ.
ރައީސް ޔާމީނަށް އިންސާފު ލިބެން ޖެހޭނެ ކަމަށާއި އެމަނިކުފާނަށް 2023 ވަނަ އަހަރު އޮންނަ ރިޔާސީ އިންތިހާބުގައި ވާދަކުރެއްވެން ޖެހޭނެ ކަމަށް ގަބޫލު ކުރައްވާކަމަށްވެސް ނަޝީދު ދާދި ފަހުން ވަނީ ވިދާޅުވެފަ އެވެ.
