ކޮވިޑް19 ބަލިމަޑު ކަމާއި ގުޅިގެން ރާއްޖޭގައި އިއުލާންކޮށްފައިވާ އާއްމު ސިއްހަތުގެ ކުއްލި ނުރައްކަލުގެ ހާލަތު 18 ވަނަ ފަހަރަށް އިތުރުކޮށްފިއެވެ.
މިމުއްދަތު މިފަހަރުވެސް އިތުރުކޮށްފައިވަނީ އެއް މަސް ދުވަހުގެ މުއްދަތަކަށެވެ. ހެލެތް މިނިސްޓަރ އަހުމަދު ނަސީމް ސޮއިކުރައްވާ ނެރުއްވާފައިވާ ގަރާރުގައި މި ހާލަތު ދަމަހައްޓަން އަންގާފައިވަނީ އަންނަ ސެޕްޓެމްބަރުގެ އެއް ވަނަ ދުވަހަށެވެ. އެންމެ ފުރަތަމަ އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށްފައިވަނީ 2020 ވަނަ އަހަރުގެ މާރޗް މަހުގެ 12 ވަނަ ދުވަހުއެވެ.
ހެލްތް މިނިސްޓަރުގެ ގަރާރުގައި ޑިރެކްޓަރ ޖެނެރަލް އޮފް ޕަބްލިކް ހެލްތަށް ވަނީ ކޮވިޑްގެ ހާލަތު ރަނގަޅު ކުރުމަށް އަޅަންޖެހޭ ފިޔަވަޅުތައް އެޅުމަށް އަންގާފައެވެ. އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން އާއްމު ސިއްހަތުގެ ކުއްލި ނުރައްކަލުގެ ހާލަތު އިއުލާންކުރެވޭނީ އެންމެ ދިގުވެގެން އެއް މަސް ދުވަހުގެ މުއްދަތަކަށެވެ.
ކުއްލި ނުރައްކަލުގެ މި ހާލަތުގެ ދަށުން ވަނީ ކޮވިޑް ބަލިމަޑުކަން ގޯސްވުމުން މާލެ ސިޓީ އާއި އަތޮޅު ތެރޭގެ ރަށްތަކުގައިވެސް މީގެ ކުރިން ކާފިއު އިއުލާންކޮށްފައެވެ.
