ގެއްލުވާލާފައިވާ ނޫސްވެރިޔާ އަހުމަދު ރިޟްވާނުގެ މައްސަލައިގައި ސިޔާސީ ތަހުގީގެއް ހިންގައި ކުރީގެ ރައީސް އަބްދުﷲ ޔާމީން ތަހުގީގަށް ހާޒިރު ކުރުމުން ރިޟްވާނުގެ އާއިލާއަށް ތަސައްލީ ލިބޭނެތޯ، ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ރައީސް އިބްރާހިމް މުހައްމަދު ސޯލިހާއި ސުވާލު ކުރައްވައިފި އެވެ.
ރައީސް ސޯލިހުގެ މަސްލަހަތު އޮންނަ މީޑިއާތަކުން ރައީސް ޔާމީނަށް އަމާޒުވާނެހެން ބައެއް ލިޔުންތައް ޝާއިއު ކުރަމުން ދާތީ ޖަމީލު އެކަން ފާހަގަކުރެއްވި އެވެ. އަދި އެއާއެކު ރައީސް ސޯލިހަށް ރިޟްވާނު މައްސަލައިގައި އިންސާފު ހޯއްދަވައިދެއްވުނީތޯ ޖަމީލު ސުވާލު ކުރެއްވި އެވެ.
"ސިޔާސީ ތަހުގީގު ހިންގުމާއި ޕްރޮޕެގެންޑާ ލިޔުންތަކުން އާއިލާއަށް ތަސައްލީ ލިބެނީތޯ؟"
- ޑރ. މުހައްމަދު ޖަމީލު އަހުމަދު
ރިޟްވާނުގެ މައްސަލައާއި ރައީސް ޔާމީނާއި އެއްވެސް ގުޅުމެއް ނެތްކަމަށް މަރު ކޮމިޝަންގެ ކުރީގެ ރައީސް ހުސްނު ސުއޫދު މީގެ ކުރިން ވަނީ ވިދާޅުވެފަ އެވެ. އެހެންނަމަވެސް މީގެ ދެދުވަސްކުރިން ރައީސް ޔާމީނު މަރު ކޮމިޝަނަށް ހާޒިރު ކުރަން ވަނީ ޗިޓު ފޮނުވައިފަ އެވެ.
މިކަމަށް އިޝާރާތް ކުރައްވައި ޖަމީލު ވަނީ ރިޟްވާނުގެ މައްސަލައިގައި އޭރު ރައީސް ޔާމީންގެ ވެރިކަމުގައި ދައުވާ އުފުލުނު މީހުން ރައީސް ސޯލިހުގެ އަރިހުގައި ނެތްތޯވެސް ސުވާލު އުފައްދައިފަ އެވެ.
ފާހަގަކޮށްލެވޭ ގޮތުގައި ރިޟްވާނުގެ ތަހުގީގަކީ ވެރިކަމުގެ އެންމެ ފުރަތަމަ 24 ގަޑިއިރުގެ ތެރޭގައި ކުރައްވާނެ ކަމަށް ރައީސް ސޯލިހު ވައުދުވެ ވަޑައިގެންނެވި ކަމެކެވެ. ޖަމީލު ވިދާޅުވީ 24 ގަޑިއިރު ތެރޭގައި ކުރަން ވައުދުވި ކަންތަކަށް މިހާރު ތިން އަހަރު ވެފައިވާ ކަމަށެވެ.
"ނާގާބިލުކަމުގެ ރަންވަނަ ރައީސް ސޯލިހަށް ލިބިެއްޖެ"
- ޑރ. މުހައްމަދު ޖަމީލު އަހުމަދު
ރައީސް ސޯލިހު ވެރިކަމަށް ވަޑައިގެން ވަނީ ގެއްލުވާލާފައިވާ އަދި މަރާލާފައިވާ މީހުންގެ މައްސަލަތައް ތަހުގީގު ކުރަން ރިޔާސި ކޮމިޝަނެއް އުފައްދައިފަ އެވެ. އެހެންނަމަވެސް އެ ކޮމިޝަންގެ މަސައްކަތްތައް ލަސްކަމުގެ ޝަކުވާ ގިނަ ބަޔަކު ދަނީ ކުރަމުންނެވެ. އެ ކޮމިޝަނުން މިހާތަނަށް އެއްވެސް ތަހުގީގެއް ފުރިހަމަ ކޮށްފައި ނުވާއިރު ރައީސް ސޯލިހުގެ ވެރިކަމުގައި 2019 ވަނަ އަހަރުވެސް ވަނީ ޒުވާން އަންހެނަކު ވީނުވީއެއް ނޭނގި ގެއްލިފަ އެވެ. އެމައްސަލައިގެ ތަހުގީގަށް ވީނުވީއެއް ނޭނގުމުން އެވާހަކަވެސް އިދިކޮޅުން ދަނީ ފާހަގަކުރަމުންނެވެ.
