އަންނަ އާދިއްތަ ދުވަހުން ފެށިގެން ސަރުކާރުން ދޭ ހިދުމަތްތައް އޮފީސްތައް ހުޅުވައިގެން ދޭން ރައީސް އިބްރާހިމް މުހައްމަދު ސޯލިހު ނިންމަވައިފި އެވެ.
ވޭތުވެދިޔަ ދިގު މުއްދަތެއްގައި ސަރުކާރުގެ ހިދުމަތްތައް ދެމުން ދިޔައީ އޮންލައިންކޮށެވެ. އޮފީސްތައް ހުޅުވައިގެން ދެމުން ދިޔައީ ހަމައެކަނި އޮންލައިންކޮށް ނުދެވޭ ހިދުމަތްތަކެވެ. އަދި އެ މުއްދަތުގައި ގިނަ މުވައްޒަފުން މަސައްކަތް ކުރީ ގޭގައި ތިބެގެން އޮންލައިންކޮށެވެ.
ރައީސް އޮފީހުން އިއްޔެ ބުނީ ކޮވިޑުން ރައްކާތެރިވުމުގެ ގައިޑްލައިންތަކާ އެއްގޮތަށް ސަރުކާރު އޮފީސްތަކަށް މުވައްޒަފުން ހާޒިރުވެގެން މަސައްކަތް ކުރުމަށް އެޗްޕީއޭއިން ހުއްދަދިނުމާއި ގުޅިގެން އޮފީސްތައް ހުޅުވަން ރައީސް ސޯލިހު ނިންމަވާފައިވާ ކަމަށެވެ.
މުވައްޒަފުން އޮފީހަށް ހާޒިރުވެގެން މަސައްކަތްކުރަން ފެށިނަމަވެސް، ހުސްވި މަހުގެ 01 ވަނަ ދުވަހުގައި އެއޮފީހުން ނެރުނު ދެންނެވުމުގައި ބަޔާންކޮށްފައިވާ އުސޫލުތަކާއި މިންގަނޑުތަކާ އެއްގޮތަށް ސަރުކާރުގެ ހުރިހައި އިދާރާއަކުން ޢަމަލުކުރުމަށް ރައީސް އޮފީހުން ވަނީ އިލްތިމާސްކޮށްފަ އެވެ.
ހަމައެހެންމެ ރަސްމީ މަސައްކަތު ގަޑީގެ ތެރޭގައި މަސައްކަތް ނިންމުމަށް މުވައްޒަފުންނަށް ބާރުއެޅުމަށާއި،ނުރަސްމީ ގަޑީގައި މުވައްޒަފުން މަސައްކަތްކުރަން ނުޖެހޭގޮތަށް އޮފީހުގެ މަސައްކަތްތައް ރޭވުމަށް ވެސް ރައީސް އޮފީހުން ވަނީ އަންގައިފަ އެވެ. ދަންފަޅި އުސޫލުން މަސައްކަތްކުރާ އިދާރާތައް ފިޔަވައި، ސަރުކާރުގެ އެހެން އިދާރާތަކުން ކޮންމެހެން ކުރަންޖެހޭ މަސައްކަތެއް ކުރުމަށް ޓަކައި މެނުވީ ރަސްމީ ގަޑީގެ ފަހުން އޮފީސް ހުޅުވައިގެން މަސައްކަތް ނުކުރުމަށް އޮފީސްތަކަށް ވަނީ އަންގައިފަ އެވެ.
ސަރުކާރުގެ އިދާރާތަކުން އޮންލައިންކޮށް ދޭން ފެށި ޚިދުމަތްތައް އެ ގޮތުގެ މަތީން ދެމުން ގެންދިޔުމަށާއި، އޮންލައިންކޮށް ދެވެންހުރި އިތުރު ޚިދުމަތްތަކަކީ ކޮބައިތޯ ބަލައި، އެފަދަ ޚިދުމަތްތައް އޮންލައިންކޮށް ދެވޭނެ އިންތިޒާމުތައް ހަމަޖައްސަމުން ގެންދިޔުމަށް ރައީސް އޮފީހުގެ އިއުލާނުގައި ވަނީ ބުނެފަ އެވެ.
މީގެ އިތުރުން ނުރަސްމީ ގަޑީގައި މަސައްކަތް ކުރިނަމަވެސް އެންމެ ލަސްވެގެން ހަވީރު 4:00 ގައި އޮފީސްތައް ބަންދު ކުރަން ރައީސް އޮފީހުން ވަނީ އަންގައިފަ އެވެ.
