އާއްމުކޮށް ހުޅުވާލައިގެން އެސްޓްރެޒެންކާ ވެކްސިން ޖަހައިދޭން މިއަދު ފަށާނެ ކަން އެޗްޕީއޭއިން އިއުލާން ކޮށްފިއެވެ.
އެގޮތުން މިއަދުން ފެށިގެން މާލެ ސަރަހައްދުގެ ހުރިހާ ވެކްސިން ސެންޓަރަކުންވެސް ކުރިން ބުކިން ހެއްދުމަކާ ނުލާ ދިއުމުން ވެކްސިން ޖަހައިދޭ ގޮތަށް ވަނީ ހަމަޖައްސާފައެވެ. ވެކްސިން ޖަހައިދޭ ސެންޓަރުތަކަކީ ސޯޝަލް ސެންޓަރު، އިސްލާމީ މަރުކަޒު، އާރޓް ގެލަރީ، އަދި ވިލިމާލެ ހޮސްޕިޓަލެވެ. އެޗްޕީއޭއިން ބުނީ އެތަނަށް ދިއުމުން ވެކްސިން ޖަހައިދޭ ގޮތަށް ނިންމާފައި އޮތަސް ކުރިން ބުކިން ހައްދައިގެން ވެކްސިން ޖަހަންދާ ފަރާތްތަކަށް ހާއްސަ އިސްކަމެއް ދޭނެ ކަމަށެވެ.
މާލެ ސަރަހައްދުގައި ހުރި ވެކްސިނޭޝަން ސެންޓަރުތަކުން ވެކްސިން ޖަހަމުން ދާނީ ހޮނިހިރު ދުވަހުން ފެށިގެން ބުދަ ދުވަހާއި ހަމައަށް ހެނދުނު 9 އަކުން ރޭގަނޑު 8 ކަށެވެ.
އަދި ބުރާސްފަތި ދުވަހު ހެނދުނު 9 އަކުން މެންދުރު 12:30 އަށެވެ. ހުކުރު ދުވަހު މެންދުރުފަހު 15:15 އިން ފެށިގެން ރޭގަނޑު 20:00 އަށެވެ.
މިހާތަނަށް ރާއްޖެއިން ވެކްސިން ޖަހާފައިވާ ޖުމުލަ އަދަދަކީ 330،504 އެކެވެ. މީގެ ތެރެއިން ދެ ޑޯޒް ފުރިހަމަ ކޮށްފައިވަނީ 284،329 މީހުންނެވެ.
