ރަށްރަށުގެ މިސްކިތްތަކުގައިވެސް ގުނޫތު ނާޒިލާ ނުކިއުމަށް އިސްލާމިކް މިނިސްޓްރީން އަންގައިފިއެވެ.
މިނިސްޓްރީން ރަށްރަށަށް ފޮނުވާފައޮވާ ސާރކިއުލަރއެއްގައި ބުނެފައިވަނީ، ރާއްޖޭގައި މިހާރު އަންނަނީ ކޮވިޑްގެ ހާލަތު ރަނގަޅުވަމުން ކަމަށްވުމާއެކު ކަމާބެހޭ ފަރާތްތަކުން ދީފައިވާ ލުއިތަކާއެކު މޮނިޓަރިންގެ ހާލަތުގައި ނެތް ރަށެއްނަމަ ގުނޫތު ނާޒިލާ ކިޔުން މިވަގުތަށް މަޑުޖައްސާލުމަށް އަންގާ ކަމަށެވެ.
މީގެ އިތުރުން މާލެ ސާރަހައްދުގެ މިސްކިތްތަކުގައި ޖަމާއަތް ގައިދުރުކޮށް ހެދުމާއި އަދި ޖަމާއަތުގެ ނަމާދުތަކުގައި ކޮވިޑް 19ގެ ހާލަތާއި ގުޅިގެން ކިޔަމުން އައި ގުނޫތު ނާޒިލާ ކިޔުން މިމަހުގެ 7 ވަނަ ދުވަހުގެ ފަތިސް ނަމާދުން ފެށިގެން މަޑު ޖައްސާލާފައެވެ.
އިސްލާމިކް މިނިސްޓްރީން ބުނީ ގުނޫތު ނާޒިލާ ކިޔުން މިވަގުތަށް ހުއްޓާލި ކަމުގައި ވިއަސް ފަރުޟު ނަމާދުތައް ބަރާބަރަށް އަދާކޮށް ސުންނައް ނަމާދު ގިނަކޮށް ގުރުއާން ކިޔަވައި، އިސްތިގުފާރު ކުރުމަށާއި، މިބަލިމަޑުކަމުން އަވަހަށް ސަލާމަތްކޮށްދެއްވުމަށް ދުއާކޮށް އުޅުމަށް ހުރިހާ ރައްޔިތުންނަށް ނަސޭހަތްތެރިވާ ކަމަށެވެ.
