ރައީސް އިބްރާހިމް މުހައްމަދު ސޯލިހު، ރައްޔިތުންގެ މަޖިލީހުގެ ވިލުފުށީ ދާއިރާގެ މެމްބަރު ހަސަން އަފީފަށް ފިޔަވަޅު އަޅުއްވަން އަންގަވާފައިވާކަމަށް އޭނާ ވިދާޅުވެއްޖެ އެވެ.
އަފީފު ދާދި ފަހުން ވަނީ ރައީސް ސޯލިހު ހުންނެވީ އަދާލަތު ޕާޓީގައި ނޫންކަންވެސް އެނގިވަޑައިނުގަންނަވާކަމަށް ވިދާޅުވެ، ރައީސަށް ވަރަށް ބޮޑަށް ފާޑު ވިދާޅުވެފަ އެވެ. ރާއްޖޭގެ ޓީވީ ޗެނަލެއްގެ ޕްރޮގުރާމެއްގައި ވާހަކަ ދައްވަމުން އަފީފު ވިދާޅުވީ އެކަމާއި ގުޅިގެން އޭނާއަށް ފިޔަވަޅު އަޅުއްވަން ރައީސް އަންގަވާފައިވާ ކަމަށެވެ.
މީގެ ކުރިން އަފީފު ވަނީ ރައީސް ސޯލިހުގެ އެންމެ އަރިހުގައި ތިއްބެވީ އަދާލަތު ޕާޓީގެ މެމްބަރުން ކަމަށް ވިދާޅުވެފަ އެވެ. ރޭވެސް އެވާހަކަ ތަކުރާރު ކުރެއްވި އެވެ. ވިދާޅުވީ ފިޔަވަޅު އަޅަން އެންގެވި ނަމަވެސް އަރިހުގައި ތިއްބެވީ އަދާލަތުގެ މެމްބަރުން ކަމަށެވެ. މިސާލު ޖައްސަވަމުން ވިދާޅުޥީ އަދާލަތުގެ ނާއިބް ރައީސްކަން ކުރެއްވި އަލީ ޒާހިރު ޗީފް އޮފް ސްޓާފަކަށް ބެހެއްޓެވުމުން އެމްޑީޕީގެ މެންބަރުންނަށް ވުރެ ބޮޑަށް ރައީސް ސޯލިހް އަދާލަތުގެ މެންބަރުންނަށް އިތުބާރު ކުރައްވާކަން ހާމަވާ ކަމަށެވެ.
އަފީފު ވިދާޅުވީ އެ މަގާމަށް އެކަށޭނަ އެތައް ބޭފުޅުންނެއް އެމްޑީޕީގައިވެސް ތިއްބެވި ކަމަށެވެ. ރައީސް އޮފީހުގެ އެހެނިހެން މަގާމުތަކުގައިވެސް އެމްޑީޕީގެ އެފަދަ ބޭފުޅުން ތިއްބެވި ކަމަށް ވިދާޅުވި އެވެ.
އެމްޑީޕީ އެތެރޭގައި އުފެދިފައިވާ ހިޔާލު ތަފާތުވުންތަކުގެ ސަބަބުން ރައީސް ސޯލިހާއި އެޕާޓީގެ ރައީސް މުހައްމަދު ނަޝީދާއި ދެމެދު ވަނީ ވަރަށް ބޮޑަށް މައްސަލަ ޖެހި ގުޅުން ކެނޑިފަ އެވެ. ޕާޓީގެ މެމްބަރުންވެސް ވަނީ ދެބަޔަކަށް ބެހިފަ އެވެ. އަފީފު ތާއީދު ކުރައްވަނީ ރައީސް ނަޝީދަށެވެ.
މަޖިލީހުގައި ތިބި އެމްޑީޕީގެ ގިނަ މެމްބަރުންނަކީ ރައީސް ސޯލިހަށް ތާއީދު ކުރައްވާ މެމްބަރުންނެވެ. އެހެންނަމަވެސް ޕާޓީގެ ލީޑަޝިޕްގެ ގިނަ ބޭފުޅުން ތިއްބެވީ ރައީސް ނަޝިދާއިއެކު އެމަނިކުފާނުގެ ފަޅީގަ އެވެ.
