މިއަހަރުގެ އޯ-ލެވެލް އިމްތިހާނުގެ ނަތީޖާ މިހާރު އިމްތިހާނު ސެންޓަރު ތަކުން ދޫކުރަން ފަށާފައިވާ ކަމަށް މިނިސްޓްރީ އޮފް އެޑިއުކޭޝަނުން ހާމަކޮށްފިއެވެ.
އެޑިއުކޭޝަން މިނިސްޓްރީން ބުނީ އެސް.އެސް.ސީގެ ނަތީޖާ މިއަދު 13:00 ގައި އިމްތިޙާނު ސެންޓަރުތަކަށް ލިބޭނެ.ކަމަށެވެ. އަދި ސެންޓަރުތަކަށް ނަތީޖާ ލިބުމާއެކު ނަތީޖާ ދޫކުރުމުގެ ކަންކަން ސެންޓަރުތަކުން އިންތިޒާމުކުރާ ގޮތެއްގެ މަތީން ކުރިޔަށްދާނެ ކަމަށް ވެސް މިނިސްޓްރީން ހާމަކުރެއެވެ.
5000 އަށްވުރެ ގިނަ ދަރިވަރުންނާއެކު ކުރިއަށްގެންދިޔަ މިއަހަރުގެ އޯލެވެލް އިމްތިހާނު ނިންމާލާފައިވަނީ ޖޫން މަހުގެ އެގާރަ ވަނަ ދުވަހުއެވެ. މެއި ޖޫންގެ އޯލެވެލް އިމްތިހާން ކުރިއަށްގެންގޮސްފައިވަނީ ކޮވިޑް-19ގެ ހާލަތާއި ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތަކާ އެކުއެވެ.
މެއި 2 އިން ޖޫން 11 އަށް ކުރިއަށްދިޔަ މިއަހަރުގެ އޯލެވެލް އިމްތިޙާނުގައި މާލެއާއި އަތޮޅުތަކުން ޖުމްލަ 5955 ދަރިވަރަކު ވަނީ ބައިވެރިވެފައެވެ. އޭގެ ތެރޭގައި ހިމެނެނީ މާލޭގެ ސްކޫލްތަކުން 2196 ދަރިވަރުންނާއި، އަތޮޅުތަކުގެ ސްކޫލްތަކުން 3759 ދަރިވަރުންނެވެ. މީގެތެރޭގައި އެސް.އެސް.ސީ އިމްތިޙާނުގައި ބައިވެރިވާ 225 ދަރިވަރުންވެސް ހިމެނެއެވެ. އޯލެވެލް އިމްތިހާނު މިފަހަރު ކުރިޔަށްގެންގޮސްފައިވަނީ މާލޭގެ 22 ސެންޓަރަކާއި، އަތޮޅުތަކުގެ 213 ސެންޓަރެއްގައެވެ.
