ދުވާލަކު އެއްފަހަރު ގޮސްގެން ނަމަވެސް ވެލާނާ އިންޓަރނޭޝަނަލް އެއަރޕޯޓްގެ މަސައްކަތް ކުރިއަށްދޭތޯ ބެއްލެވުމަށް މާވަށުގެ ދާއިރާގެ މެމްބަރު މުހައްމަދު ސައީދު އެދިވަޑައިގެންފިއެވެ.
ގައުމީ އެއަރލައިންގެ ހާލަތު ރަނގަޅު ކުރަން ޖޮއިންޓް ވެންޗަރ އެއް ހެދުމަށް ބޭރުގެ ފަރާތްތަކާއި މަޝްވަރާ ކުރައްވާ ކަމަށް ރައީސް ސާލިހު ވިދާޅުވުމާއި ގުޅިގެން އެކަމަށް އިޝާރާތް ކުރައްވާ މެމްބަރު ސައީދު ވިދާޅުވީ، ބޮޑު މުސާރައިގައި ބޭރު މީހުން ތިބީ ޗުއްޓީގައި ކަމަށެވެ. އަދި ސީޕްލޭން ޓާރމިނަލް ނިމިފައި ހުންނަތާ ދެއަހަރު ވެފައިވާ ކަމަށާއި ގައުމީ އެއަރލައިން ނުވިއްކާ މިކަންކަން ކުރެއްވުމަށް ސައީދުގެ ޓުވީޓުގަިއ ވަނީ އެދިވަޑައިގެންފައެވެ.
ނޫސްވެރިންނާއި ވާހަކަދައްކަވަމުން ރައީސް ސާލިހު ވިދާޅުވީ، ގައުމީ އެއާލައިން އައިލެންޑް އޭވިއޭޝަންގެ މާލީ ހާލަތު ރަނގަޅުކުރުމުގެ ގޮތުން ބޭރުގެ ފަރާތްތަކަކާއެކު ޖޮއިންޓް ވެންޗާ ކުންފުންޏެއް ހެދުމަށް މަޝްވަރާކުރަމުން އަންނަ ކަމަށެވެ. އެހެންނަމަވެސް ރާއްޖޭގެ ގައުމީ އެއަރލައިނެއް އޮންނަންޖެހޭ ކަމަށް ރައީސް ވިދާޅުވިއެވެ. އަދި ސަރުކާރުން ސަބްސިޑީ ދީގެންވެސް ގައުމީ އެއާލައިން ދަމަހައްޓަންޖެހޭ ކަމަށް ވިދާޅުވިއެވެ.
