ހަރުކަށި ފިކުރާއި ދީނަށް ފުރައްސާރަ ކުރުން، ދެ ފިކުރުންވެސް ގައުމު ސަލާމަތް ކުރަަންޖެހޭ ކުރީގެ އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ހަރުކަށި ފިކުރާ ދެކޮޅަށް ރައްޔިތުން ހޭލުންތެރިކުރުވުމަށް ދެ އަހަރު ދުވަހުގެ ކެމްޕޭނެއް ފެށުމަށް ހަމަޖެހިފައިވާ ކަމަށް އިސްލާމިކް މިނިސްޓްރީން މައުލޫމާތުދީފައިވާ ހަބަރަކާއި ގުޅިގެން ޝަހީމް ކުރެއްވި ޓުވީޓެއްގައި ވިދާޅުވީ، މި ކެމްޕެއިން ކާޟިޔާބުވާނީ ހަރުކަށި ފިކުރުގެ އިތުރުން ދީނަށް ފުރައްސާރަ ކުރުމުގެ ނުބައިކަމާ ބެހޭގޮތުން ވެސް ކެމްޕެއިން ކުރެވިގެން ކަމަށެވެ.
އަދި އެ ދެ ފިކުރަކީ އެއް ފައިސާ ފޮއްޗެއްގެ ދެ ފަރާތް ކަމަށާއި މި ދެ ފިކުރުންވެސް ގައުމު ސަލާމަތް ކުރަންޖެހޭ ކަމަށެވެ. މީގެ އިތުރުން ޝަހީމް ވިދާޅުވީ، ގައުމީ އެއްބައިވަންތަކަން ދެމެހެއްޓޭނީ އޭރުން ކަމަށެވެ.
އެމްޑީޕީގެ މެއި ހައެއް ކޮމިޓީގެ ފަރާތުން މައުލޫމާތުދެއްވަމުން ވިކުފުށި ދާއިރާގެ މެމްބަރު ހަސަން އަފީފު ވިދާޅުވީ، ހަމަ ހުރެފައި މީހުންމަރަން ގޮވުމާއި ލޭ ހުއްދަކުރާ ގޮތަށް ދީނުގައި އޮންނަ ގޮތުން ވާހަކަދެއްކިދާނެތޯ އިސްލާމިކް މިނިސްޓްރީގެ ބޭފުޅުން ކައިރިން ސާފުކުރެއްވި ކަމަށެވެ.
މެއި ހައެއް ކޮމިޓީ އުފައްދާފައިވަނީ ރައީސް ނަޝީދަށް ދިން ހަމާލާ އާއި ގުޅިގެން ކަންކަން ސާފުކޮށް މައުލޫމާތު އެއްކުރުމަށެވެ.
