ވެކްސިން ނުޖަހާ މުވަށްޒަފުންނަށް ދަތިކުރުމުގެ ފިޔަވަޅު އެޅުމަށް ސީއެސްސީން ނިންމައިފިއެވެ.
ސިވިލް ސާރވިސް ކޮމިޝަނުން ނެރުނު ސާރކިއުލާރއެއްގައި ބުނެފައިވަނީ، އާއްމު ސިއްހަތު ރައްކާތެރި ކުރުމުގެ ގާނޫނުގެ 12 ވަނަ މާއްދާގެ ހ ގެ ތިން ވަނަ ނަމްބަރުގެ ދަށުން ހެލްތް ޕްރޮޓެކްޝަން އެޖެންސީން ކޮށްފައިވާ އިއުލާނުގެ 5 ވަނަ ނަމްބަރުގެ ދަށުން ކޮވިޑް19 އިން ރައްކާތެރިވުމަށް ސިވިލް ސާރވިސްގެ މުވައްޒަފުގެ ތެރެއިން ވެކްސިން ޖެހުމުގެ ޝަރުތު ފުރިހަމަވާ މުވައްޒަފުން ވެކްސިން ޖެހުމަށާއި، އަދި ވެކްސިން ޖެހުމުގެ ޝަރުތު ފުރިހަމަވާ މުވަށްޒަފުންގެ ތެރެއިން ވެކްސިންގެ އެއްވެސް ޑޯޒެއް ފުރިހަމަކޮށްފައި ނުވާ މުވަށްޒަފުން، 1 ސެޕްޓެމްބަރު 2021 ވަނަ ދުވަހުން ފެށިގެން ވަޒީފާއަށް ނިކުންނަން ވާނީ ޕީސީއާރު ޓެސްޓް ހަދައިގެން ކަމަށެވެ. އަދި ކޮންމެ 14 ދުވަހަކުން ޕީސީއާރު ޓެސްޓް ހަދައިގެން ވަޒީފާއަށް ނުކުތުމަށް ޑިރެކްޓަރ ޖެނެރަލް އޮފް ޕަބްލިކް ހެލްތް ވަނީ އަންގާފައި ކަމަށްވެސް ސާރކިއުލާގައި ބުނެފައިވެއެވެ.
ސީއެސްސީގެ ރައީސް މުހައްމަދު ނާސިހު ސޮއިކުރައްވާ ނެރުއްވި ސާރކިއުލަރގައި ވާގޮތުން ސެޕްޓެމްބަރު އެއްވަނަ ދުވަހުން ފެށިގެން ސިވިލް ސާރވިސް މުވަށްޒަފުންގެ ތެރެއިން ވެކްސިން ޖެހުމަށް ޝަރުތު ފުރިހަމަވެ ވެކްސިން ޖަހާފައިނުވާ މުވައްޒަފުން މިގޮތުގެ މަތިން އަމަލު ކުރުމަށާއި އަދި މުވައްޒަފުން އެގޮތުގެ މަތިން އަމަލުކުރާކަން ސިވިލް ސާރވިސްގެ އިދާރާތަކުން ކަށަވަރު ކުރުމަށް ވަނީ އަންގާފައެވެ.
