ކުރިއަށް އޮތް 3 ދުވަހުވެސް ވައިގަދަވެ ކަނޑުގަދަވާނެތީ ސަމާލުވުމަށް މޯލްޑިވްސް މީޓްރޮލޮޖިކަލް ސާރވިސް މެޓް އޮފީހުން އެދިއްޖެއެވެ.
މެޓް އޮފީހުން ބުނީ ހުޅަނގު މޫސުމުގެ ބާރުގަދަވެ ކުރިއަށް އޮތް ތިން ދުވަހު، އޮގަސްޓް 13، 14 އަދި 15 ގައި ރާއްޖޭގެ ސަރަހައްދުގައި ވައިގަދަވެ ކަނޑުތައް ގަދަވެގެން ދާނެ ކަމަށް ލަފާކުރެވޭ ކަމަށެވެ. މިދުވަސް ތަކުގައި ބައެއް ސަރަހައްދުތަކަށް އުދައިގެ އަސަރު ކުރުންވެސް އެކަށީގެންވާ ކަމަށް މެޓުން އޮފީހުން ހާމަކުރެއެވެ.
އެހެންކަމުން އާއްމުކޮށް ހުރިހާ ފަރާތްތަކުން ހާއްސަކޮށް ކަނޑު ދަތުރު ކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އެދިފައެވެ.
މީގެ އިތުރުން ގއ އަތޮޅުން ފެށިގެން އައްޑޫ ސިޓީއަށް ވަނީ ހުދު ސަމާލު ނެރެފައެވެ. އެގޮތުން މިރޭ 7 ން މެންދަމު 1 އަށް ބޯކޮށް ވާރޭވެހުމާއެކު ގުގުރުން އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވާނެ ކަމަށް މެޓުން ވަނީ ލަފާކޮށްފައެވެ.
