ވެކްސިން ފުރަތަމަ ފަށާނީ މާލޭގެ ސުކޫލްތަކާއި ބައެއް ރަށްތަކުގައި ކަމަށް ހެލްްތ އިމަރޖެންސީ އޮޕަރެޝަން ސެންޓަރުން ހާމަކޮށްފިއެވެ.
އެޗްއީއޯސީއާއި މީޑިއާތައް ގުޅިގެން ކުރިއަށްގެންދިޔަ "ހާލުބެލުން" ޕްރޮގްރާމްގައި އެ ސެންޓަރުގެ ތަރުޖަމާނު ޑރ.ފާތިމަތު ނަޒްލާ ރަފީޤް ވިދާޅުވީ، ސުކޫލް ދަރިވަރުންނަށް ވެކްސިން ޖެހުމުގެ އެންމެ ފަހުގެ ތައްޔާރީތައް މިހާރުވަމުންދާކަމަށާއި އެގޮތުން ރަށްރަށަށް ވެކްސިން ފޮނުވުމުގެ އިތުރުން، ސްކޫލް ދަރިވަރުންގެ ބެލެނިވެރިންނަށް ވެކްސިންއާއި ގުޅޭ މައުލޫމާތު ދިނުމުގެ ޕްރޮގްރާމްތައް މިހާރު ފަށައިގެން ކުރިއަށް ގެންދާ ކަމަށެވެ. މީގެ އިތުރުން ވެކްސިން ދިނުމުގައި އެހީތެރިވުމަށް ސުކޫލްތަކުގެ ހެލްތް އޮފިސަރުންވެސް ތަމުރީނު ކުރުމަށް ވަނީ ފަށާފައެވެ.
ޑރ.ނަޒްލާ ވިދާޅުވީ ވަރަށް އަވަހަށް ހުރިހާ ރަށަކަށްވެސް ވެކްސިން ފޮނުވާނެ ކަމަށެވެ. ވެކްސިން ޖަހަން ފުރަތަމަ ފަށާނީ އާދިއްތަ ދުވަހު ކަމަށްވެސް ތަރުޖަމާނު ވިދާޅުވިއެވެ. ރާއްޖޭގެ ހުރިހާ ރަށަކަށް ވެކްސިން ފޮނުވޭ ވަރުވާނީ އަންނަ ހަފުތާ ތެރޭގައި ކަމަށްވެސް ޑރ ނަޒްލާ ވިދާޅުވިއެވެ.
