ގިަނ ދުވަސްތަކެއް ވަންދެން ހުސްވެފައި އޮތް އިންފޮމޭޝަން ކޮމިޝަނަރުގެ މަގާމަށް އައްޔަން ކުރުމަށް ހަތަރު ނަމެއް ރައީސުލް ޖުމުހޫރިއްޔާ އިބްރާހިމް މުހައްމަދު ސާލިހު މަޖިލީހަށް ފޮނުއްވައިފިއެވެ.
އެގޮތުން ފޮނުއްވާފައިވަނީ އަލްއުސްތާޒް ޝިހާމް މުހައްމަދު ވަހީދު، އަލްއުސްތާޒް އަހުމަދު އާހިދު ރަޝީދު، އަޒުލީމާ އަހުމަދުގެ އިތުރުން މަރިޔަމް އަލީމްގެ ނަމެވެ.
އިންފޮމޭޝަން ކޮމިޝަނަރުގެ މަގާމަށް ބޭފުޅަކު އައްޔަން ކުރުމަށްޓަކައި ރައީސް އޮފީހުން ވަނީ ތިން ފަހަރެއްގެ މަތިން އިއުލާންކޮށްފައެވެ. އިންފޮމޭޝަން ކޮމިޝަނަރުގެ މަގާމު ހުސްވެފައިވަނީ ކުރިން އެ މަގާމުގައި ހުންނެވި ޙުސައިން ފިޔާޒް މޫސާ މިދިޔަ މާރިޗު މަހުގެ 21 ވަނަ ދުވަހު އިސްތިއުފާދެއްވާފައިވާތީއެވެ.
އިންފޮމޭޝަން ކޮމިޝަނަރުގެ އޮފީސް އުފައްދަވާފައިވަނީ 13 ޖުލައި 2014 ގައެވެ. މިއީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ރައްޔިތުންގެ މަޖިލީހުގެ ލަފާގެ މަތިން އުފައްދާފައިވާ ކޮމިޝަނެކެވެ.
