ރައްޔިތުންގެ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމެޓީ 241 ކޮމެޓީ އަށް ކެންދޫ ދާއިރާގެ މެމްބަރު އަލީ ހުސެއިން ހަމަޖައްސައިފިއެވެ.
241 ކޮމިޓީއަށް އަލީ ހުސެއިން ހަމަޖެއްސީ ޖުމްހޫރީ ޕާޓީގެ ސްލޮޓްގައި އިންނެވި ތިމަރަފުށީ ދާއިރާގެ މެމްބަރު އަބްދުﷲ ރިޔާޒުގެ ބަދަލުގައެވެ. މަޖިލީހުގެ ރިޔާސަތުން ކޮމިޓީއަށް މިބަދަލު އައިކަން އިއުލާންކުރެއްވީ މިއަދު ކުރިއަށްދާ މަޖިލީހުގެ ތިން ވަނަ ދައުރުގެ ތިން ވަނަ ޖަލްސާގައެވެ. ކޮމިޓީއަށް މިބަދަލު އައިސްފައިވަނީ މަޖިލީހުގެ ދެވަނަ ދައުރު ނިމުނު އިރު އަބްދުﷲ ރިޔާޒު ޖުމުހޫރީ ޕާޓީން ވަކިވެވަޑައިގެންފައިވާ ކަން މަޖިލީހަށް އަންގާފައިވާތީއެވެ.
ޕާޓީތަކަށް ގޮނޑިލިބިފައިވާ އަދަދަށް ބަލައި ކޮމިޓީތަކަށް މެމްބަރުން ކަނޑައަޅާ އިރު މަޖިލީހުގެ މިއަހަރުގެ ފަހު ދައުރުގައި ދަފްތަރަށްވެސް ވަނީ ބަދަލުތަކެއް އައިސްފައެވެ. މިބަދަލު އައިސްފައިވަނީ ޖުމްހޫރީ ޕާޓީގެ ސްލޮޓްގައި ތިއްބެވި ދެ މެމްބަރަކު ޕާޓީން ވަކިވުމާއި ގުޅިގެން އައިސްފައިވާ ބަދެލެވެ. މަޖިލީހުގެ ދަފްތަރަށް ބަދަލުތަކެއް އައިސްފައިވަނީ ދަނގެތި ދާއިރާގެ މެމްބަރު މުހައްމަދު ނާޒިމްއާއި، ތިމަރަފުށީ ދާއިރާގެ މެމްބަރު އަބްދުﷲ ރިޔާޒް، ޖުމްހޫރީ ޕާޓީން ވަކިވެފައިވާކަން އަންގަވައި، މަޖިލީހުގެ ގަވާއިދުގައި ބުނާ ލިޔުންތައް ހުށަހަޅުއްވާފައިވާތީއެވެ.
