މިހާތަނަށް 4973 ދަރިވަރުންނަށް ވެކްސިން ދީފައިވާ ކަމަށް އެޑިއުކޭޝަން މިނިސްޓްރީން ހާމަކޮށްފިއެވެ.
12 އަހަރާއި 17 އަހަރާއި ދެމެދުގެ ދަރިވަރުންނަށް ވެކްސިން ދޭން ފަށާފައިވަނީ މި ހަފުތާގައެވެ. މި އުމުރުގެ ކުދިންނަށް ދިނުމަށް ދުނިޔޭގެ ސިއްހަތު ޖަމިއްޔާއިން ކަނޑައަޅާފައިވަނީ ޕައިޒަރ ވެކްސިންއެވެ.
ރާއްޖޭގެ ސުކޫލްތަކުގައި ވެކްސިން ދިނުމުގެ ޕްރޮގްރާމް ފަށާފައިވާއިރު ސުކޫލްތަކުގައި އުމުރުން 12 އަހަރުން މަތީގެ ދަރިވަރުންގެ ތެރެއިން ވެކްސިން ޖެހޭނެ، އުމުރުފުރާގެ ތިބީ ގާތްގަނޑަކަށް 40000 ދަރިވަރުން ކަމަށް އެޑިއުކޭޝަނުން ވަނީ ހާމަކޮށްފައެވެ.
މާލެ އާއި އަތޮޅު ތެރެއިން މިހާތަނަށް 4973 ދަރިވަރުންނަށް ވެކްސިން ދީފައިވާއިރު އަދި ވެކްސިން ދޭން ޖެހޭ 35 ހާހަށްވުރެ ގިނަ ކުދިން އެބަތިއްބެވެ. ރާއްޖެއަށް ވަނީ އެމެރިކާ ސަރުކާރުން އެއްލައްކަ އަށް ވުރެ ގިނަ ޕައިޒަރ ވެކްސިންގެ ޑޯޒް ހަދިޔާކޮށްފައެވެ. ހެލްތް ޕްރޮޓެކްޝަން އެޖެންސީން ވަނީ ޕައިޒަރ ވެކްސިން ޖެހުމަށް ފަސް ގުރޫޕެއް ކަނޑައަޅާފައެވެ.
މިހާތަނަށް ރާއްޖެއިން ވަނީ 356،883 މީހުންނަށް ވެކްސިން ދީފައެވެ.
