ދަރިވަރުންނަށް ނުލިބި ހުރި ފޮތްތައް ސުކޫލްތަކަށް ފޮނުވަން ފަށައިފައިވާ ކަމަށް އެޑިއުކޭޝަން މިނިސްޓްރީން ބުނެފިއެވެ.
މިނިސްޓްރީ އޮފް އެޑިއުކޭޝަނުން ކުރެއްވި ޓުވީޓެއްގައި ބުނެފައިވަނީ، މިހާތަނަށް ދަރިވަރުންނަށް ހާޑްކޮޕީ ލިބިފައިނުވާ ފޮތްތައް މިހާރު ވަނީ މިނިސްޓްރީއަށް ލިބިފައި ކަމަށެވެ. އަދި އެ ފޮތްތައް ސްކޫލްތަކަށް ފޯރުކޮށްދިނުމުގެ މަސައްކަތް މިހާރު އެ މިނިސްޓްރީން ވަނީ ފަށާފައެވެ.
މިއަހަރުގެ ދިރާސީ އަހަރުގެ ކިޔެވުން ފަށާފައިވަނީ މިމަހުގެ 10 ވަނަ ދުވަހުއެވެ. އޭގެ ފަހުން ދެ ހަފްތާ ފާއިތުވެގެން ދިޔައިރުވެސް ދިވެހި އިސްލާމް އަދި ގުރުއާން ޓެކްސް ފޮތްތައް ބައެއް ގްރޭޑްތަކުގެ ދަރިވަރުންނަށް ލިބިފައިނުވާތީ ބެލެނިވެރިން އަންނަނީ ކަންބޮޑުވުން ފާޅު ކުރަމުންނެވެ.
މިނިސްޓްރީން މީގެ ކުރިން ބުނެފައިވަނީ ފޮތްތައް ލިބުން ލަސްވެފައިވަނީ ކޮވިޑް19 އާއި ގުޅިގެން ދަތުރު ފަތުރު ކުރުމަށް އައިސްފައިވާ ދަތިތަކުގެ ސަބަބުން ކަމަށެވެ. މިއަހަރުގެ ދިރާސީ އަހަރުގެ ކިޔެވުން ފަށާފައިވަނީ ދަރިވަރުން ސުކޫލްތަކަށް ހާޒިރުކޮށްގެންނެވެ.
