ކުރީގެ ރައީސް އަބްދުﷲ ޔާމީނުގެ މައްޗަށް އުފުލާފައިވާ ދެ ދައުވާއެއްގެ އަޑު އެހުން މާދަމާ ބާއްވަން ގޮތަށް ތާވަލްކޮށްފިއެވެ.
ދައުވާއަށް ޖަވާބުދާރީވުމަށް މާދަމާ ކްރިމިނަލްކޯޓުގައި ބާއްވާ އަޑުއެހުން ތާވަލްކޮށްފައިވަނީ ހެނދުނު 9:00 އިރަށެވެ.
މި ދައުވާއަކީ ރ. ފުއްގިރި ތަރައްގީކުރަން ކުއްޔަށް ދޫކުރުމުގެ މުއާމަލާތުގައި މަގާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް އެ ފައިސާ ލޯންޑަކޮށްފައިވާ ކަމަށް ތުހުމަތު ކުރާ މައްސަލައެއްގައި ކުރާ ދައުވާ އެކެވެ.
މީގެ ކުރިންވެސް ވަނީ މިމައްސަލައިގެ ދެ އަޑުއެހުމެއް ވަނީ ބާއްވާފައެވެ. މި މައްސަލާގައި މިމަހުގެ ފުރަތަމަ ދުވަހު ބޭއްވި އަޑު އެހުމުގައި ރައީސް ޔާމީންގެ މައްޗަށް އުފުލާފައިވާ ދެ ދައުވާ ސާބިތުކުރުމަށް ދައުލަތުން ވަނީ 86 ހެއްކެއް ހުށައަޅާފައެވެ. މިދިޔަ ޖެނުއަރީ މަހުގެ 7 ވަނަ ދުވަހު އޮތް އެ އަޑުއެހުމުގައި ރައީސް ޔާމީން ވިދާޅުވެފައިވަނީ ދައުވާ ސާފު ނުވާކަމަށެވެ. އަދި އެމަނިކުފާނު އެދިވަޑައިގަތް ލިޔުންތައްވެސް ލިބިވަޑައިގެންފައި ނުވާކަމަށް ވިދާޅުވި އެވެ.
