އިކޮނޮމިކް މިނިސްޓްރީ ޕޯޓަލް މެދުވެރިކޮށް ބިޒުނަސް ވިސާ އަށް އެދެން ޖެހޭ ގޮތަށް ހަދައިފިއެވެ.
މީގެ ކުރިން އޮންނަނީ އިމިގްރޭޝަން މެދުވެރިކޮށް ވިސާއަށް އެދޭގޮތަށެވެ. ނަމަވެސް މިއަދުން ފެށިގެން އިކޮނޮމިކް މިނިސްޓްރީގެ ޕޯޓަލް މެދުވެރިކޮށް ބިޒްނަސް ވިސާއަށް އެދެން ޖެހޭ ގޮތަށް އެމިނިސްޓްރީގެ ގަވާއިދު ވަނީ ބަދަލުކޮށްފައެވެ.
މިގޮތަށް މި އުސޫލު ބަދަލުކޮށްފައިވިއަސް ރާއްޖޭގައި ވިޔަފާރިކުރަން ޝަރުތު ހަމަނުވާ މީހުންނަށް ބިޒްނަސް ވިސާ ނުދިނުމުގެ އިހުތިޔާރު ކޮންޓްރޯލާ އޮފް އިމިގްރޭޝަނަށް ލިބިގެންވެއެވެ.
ބިޒްނަސް ވިސާއަށް އެދުމަށް މިހާރު ހަމަޖައްސާފައި އިންނަނީ 30 ދުވަހާއި 90 ދުވަހާ ދެމެދުގެ މުއްދަތަކަށެވެ. މިމުއްދަތަށް ނަގާ ވިސާއަށް ފީއެއްގެ ގޮތުގައި 750 ރުފިޔާ ނަގާ ގޮތަށް ވަނީ ހަމަޖައްސާފައެވެ. އެޕްލިކޭޝަން ހުށައަޅާތާ 10 ދުވަސް ތެރޭގައި ބިޒްނަސް ވިސާ ހޯދުމުގެ ހުއްދަ ކޮންޓްރޯލާ އޮފް އިމިގްރޭޝަނުން ދޭނެއެވެ.
