ތިލަމާލެ ބުރިޖް ޕްރޮޖެކްޓާ މެދު ރައީސް އަށްވެސް ޔަގީން ކަން ނެތް ކަން އެނގިގެން ހިނގައްޖެ ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަދުރޭ ކުރެއވްި ޓުވީޓެއްގައި ވިދާޅުވީ، ތިލަމާލެ ބުރިޖުގައި ސޮއިކުރުމުގެ ރަސްމިއްޔާތަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވެސް އަދި ނައިބު ރައީސް ފައިސަލް ނަސީމްވެސް ވަޑައި ނުގަތުމަކީ އެ ޕްރޮޖެކްޓާއި މެދު ހުދު ރައީސް ސާލިހަށްވެސް ޔަގީންކަން ނެތް ކަމުގެ އަލިގަދަ ހެއްކެއް ކަމަށެވެ.
ތިލަމާލެ ބުރިޖު ޕްރޮޖެކްޓަކީ ރައީސް ސާލިހުގެ ރިޔާސީ ވައުދަކަށް ވާއިރު 2018 ނޮވެމްބަރު މަހު ހުވާ ކުރެއްވެވި ފަހުން އެކި ފަހަރު މަތިން މި ޕްރޮޖެކްޓްގެ މަސައްކަތް ފަށާނެކަމަށް ދަނީ ވިދާޅުވަމުންނެވެ. ނަމަވެސް މި ޕްރޮޖެކްޓްގެ އަމަލީ މަސައްކަތް ފެށުމަށް ސޮއިކުރީ އަދި މިއަދުއެވެ. މި މަޝްރޫއުގެ އަމަލީ މަސަައްކަތް ކުރުމަށް ހަވާލުކުރީ އިންޑިއާގެ އެފްކޮންސް އިންފްރާސްޓްރަކްޗަރާއެވެ.
ގްރޭޓަރ މާލޭ ކަނެކްޓިވިޓީ ޕްރޮޖެކްޓް" މަޝްރޫގެ ދަށުން 6.7 ކިލޯ މީޓަރުގެ ދިގު ބްރިޖް އަދި ކޯސްވޭއިން މާލެއާއި ވިލިމާލެއާއި، ތިލަފުށި އަދި ގުޅީފަޅު ގުޅާލުމަށް ހަމަޖެހިފައިވެއެވެ. އިންޑިއާ ހިލޭ އެހީއާއި ލައިން އޮފް ކްރެޑިޓްގެ ދަށުން ވަނީ މި މަޝްރޫއަށް ބޭނުންވާ މާލީ އެހީ ހަމަޖައްސާފައެވެ. އެގޮތުން މި މަޝްރޫއަށް 100 މިލިއަން ޑޮލަރުގެ ގްރާންޓް އަދި 400 މިލިއަން ޑޮލަރުގެ ލައިން އޮފް ކްރެޑިޓް އިންޑިއާ ސަރުކާރުން ދީފައިވެއެވެ.
