ސަރުކާރުގެ ކަމާބެހޭ ފަރާތްތަކުން ބޭއްވި ބައްދަލުވުމަށްފަހު ސްރީލަންކާ ފުރަބަންދު ކޮށްފައި އޮތް މުއްދަތު ސެޕްޓެމްބަރު 6 ގެ ނިޔަލަށް އިތުރުކޮށްފިއެވެ.
އެގައުމުގެ ނޫސްތަކުން ރިޕޯޓްކޮށްފައިވާ ގޮތުން ފުރަބަންދު މުއްދަތު އިތުރުކޮށްފައިވަނީ ކޮވިޑް19 ގެ ތިން ވަނަ ރާޅެއް އަރައި އެގައުމުން ޕޮޒިޓިވްވާ މިންވަރު ވަރަށް ބޮޑަށް އިތުރުވެފައިވާތީއެވެ. ދިހަ ދުވަހުގެ ފުރަބަންދަކަށް ދާން ސްރީލަންކާގެ ރައީސް ގޮތަބަޔާ ރާޖަޕަކްސާ ނިންމާފައިވަނީ މިމަހުގެ ވިހި ވަނަ ދުވަހުއެވެ. ސްރީލަންކާގެ ހެލްތް މިނިސްޓަރ ވިދާޅުވެފައިވަނީ މިހާރު އިއުލާން ކޮށްފައިވާ ފުރަބަންދު ސެޕްޓެމްބަރު ހައެއްވާ ހޯމަ ދުވަހުގެ ފަތިހު ހަތަރެއް ޖަހަންދެން އޮންނާނެ ކަމަށެވެ.
ސަރުކާރުން ފާހަގަކޮށްފައިވަނީ ފުރަބަންދު އާއްމު ރައްޔިތުން މާ ސީރިއަސް ކޮށް ނުނަގާ ކަމަށާއި ނަމަވެސް މިދުވަސްވަރު ގޭގައި ތިބެގެން މަސައްކަތް ކުރުމަށާއި ބޭނުން ނޫން ގޮތުގައި ދަތުރުތައް ނުކުރުމަށް އިލްތިމާސްކޮށްފައިވެއެވެ. ހުކުރު ދުވަހު ފުރަބަންދު އިތުރު ކުރަން ނިންމާފައިވަނީ އެގައުމުން ބުދަ ދުވަހު އެކަނިވެސް 200 އަށްވުރެ ގިނަ މީހުން ކޮވިޑްގައި މަރުވި ކަމަށް ރިޕޯޓް ކޮށްފައިވާތީއެވެ.
