ކޮވިޑް19ގެ ހާލަތާއި ގުޅިގެން އެޗްޕީއޭއިން އައްޑޫސިޓީގެ ހިތަދޫ، މަރަދޫ، މަރަދޫފޭދޫ އަދި ފޭދޫ މޮނިޓަރިން އަށް ލުމާއި ގުޅިގެން އައްޑޫ ސިޓީ ކައުންސިލުން ހާއްސަ ފިޔަވަޅުތަކެއް އަޅައިފިއެވެ.
ކައުންސިލް އިދާރާއިން ނެރުނު އިއުލާނެއްގައި ބުނެފައިވަނީ، މިއަދުން ފެށިގެން އާއްމުކޮށް ބާއްވާ އެއްވުންތަކާއި ޕާޓީތައް ބޭއްވުން 2 ހަފްތާއަށް މެދުކަނޑާލުމަށް އަންގާ ކަމަށެވެ. އަދި ހިތަދޫ، މަރަދޫ، މަރަދޫފޭދޫ އަދި ފޭދޫގެ ސުކޫލްތައް 2 ހަފްތާއަށް ބަންދުކުރުމާއެކު، އަދި މިނިސްޓްރީ އޮފް އެޑިއުކެޝަނުން އަންގާ ގޮތެއްގެ މަތިން ގުރޭޑް 9 އަކުން މަތީގެ ގްރޭޑްތަކުގެ ކިޔެވުން ރައްކާތެރިކަމުގެ ފިޔަވަޅުތަކާއި އެކު ކުރިއަށް ގެންދިއުމަށް ވަނީ ބުނެފައެވެ. އަދި 2021 އޮގަސްޓް 29 ވަނަ ދުވަހުގެ ރޭގެ 21:00 ފެށިގެން ފަތިހު 4:00 ގެ ނިޔަލަށް ކާފިއު ވަގުތު ކަމުގައި ހަމަޖައްސައި މިވަގުތުތަކުގައި ބޭރަށް ނިކުތުން ވަނީ މަނާކޮށްފައެވެ. އެހެންނަމަވެސް ކޮންމެހެން ބޭރަށް ނިކުންނަން ޖެހޭނަމަ އައްޑޫ އީއޯސީގެ ހުއްދައާއެކު ބޭރަށް ދިއުމަށް ވަނީ އިލްތިމާސް ކޮށްފައެވެ.
މީގެ އިތުރުންވެސް ގާޑިއާ، ހޮޓާ، ކެފޭ އަދި ރެސްޓޯރަންޓް ފަދަ ކާބޯތަކެތީގެ ހިދުމަތް ދޭ ތަންތަނުން 21:00ގެ ނިޔަލަށް ހުޅުވައިގެން ހިދުމަތް ދިނުމާއި، އަދި 00:00 އާ ހަމައަށް ހަމައެކަނި ޑެލިވަރީގެ ހިދުމަތް ދިނުމަށްވެސް އިއުލާންގައި ބުނެފައިވެއެވެ. ފިހާރަތަކުން 21:00 ގެ ނިޔަލަށް ހުޅުވައިގެން ހިދުމަތް ދިނުމާއި އަދި 22:00 ގެ ނިޔަލަށް ޑެލިވަރީގެ ހިދުމަތް ދިނުމަށްވެސް ބުނެފައިވެއެވެ.
މީގެ އިތުރުން 31 އޮގަސްޓްވަނަ ދުވަހުން ފެށިގެން އައްޑޫ ސިޓީން ފުރާ އެންމެން ގެ ޕީސީއާރު ނެގެޓިވް ނަތީޖާއަކާއެކު ފުރުމުގެ ހުއްދަ ދިނުމާއި ޒަރޫރީ ބޭނުމަށް ދަތުރުކުރާ އެންމެހައި ފަރާތްތައް އެޅިފައިވާ ހާއްސަ ފިޔަވަޅުތަކާއި އެއްގޮތަށް އަމަލުކުރުމަށް ހެލްތް ޕްރޮޓެކްޝަން އެޖެންސީން އަންގާފައިވާ ކަމަށް ވެސް އިއުލާނުގައި ބުނެފައިވެއެވެ.
