އިސްލާމް މުގައްރަރަށް ގެންނަ ބަދަލުތަކާއި އުނި އިތުރު ރައްޔިތުންނަށް އެނގެންޖެހޭ ކަމަށް ކުރީގެ އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އެމްޑީޕީގެ މެއި 6 ކޮމިޓީގެ މުގައްރިރު ހަސަން އަފީފު ރޭ ވިދާޅުވެފައިވަނީ ނަފްރަތު އުފެއްދުމަށް މަގުފަހިވާ ފަދަ ލިޔުންތައް އިސްލާމް ފޮތްތަކުން ބަދަލުކުރުމުގެ މަސައްކަތް އެޑިއުކޭޝަން މިނިސްޓްރީން ފަށާފައިވާ ކަމަށެވެ. މިކަމަށް އިޝާރާތް ކުރައްވާ ޝަހީމް ވިދާޅުވީ، އިސްލާމް މުގައްރަރުތަކަށް ގެންނަ ބަދަލުތަކާއި ގެންނަ އުނި އިތުރު ރައްޔިތުންނަށް ސާފުވާން ޖެހޭނެ ކަމަށެވެ. އިސްލާމް މުގައްރަރަކީ ތައުލީމީ ނިޒާމުގެ ތެރޭގައި ހިމެނޭ އެންމެ މުހިންމު އެއް މާއްދާ ކަމަށާއި ތަރުބިއްޔަތު ވެގެންދާނީ އޭގެ އަލީގައި ކަމަށް ޝަހީމް ވިދާޅުވިއެވެ.
މެއި 6 ކޮމިޓީން ކުރަމުންދާ މަސައްކަތުގެ މައުލޫމާތު ދިނުމަށް ރޭ ބޭއްވި އެޕާޓީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުން އެ ކޮމެޓީގެ މުގައްރިރު ވިލުފުށީ ދާއިރާގެ މެމްބަރު ހަސަން އަފީފް ވިދާޅުވީ ރާއްޖޭގެ ސުކޫލްތަކުގައި އިސްލާމް މާއްދާ ކިޔަވައިދޭނެ ވަކި އިންސައްތައަކީ ބޭރު ޓީޗަރުންގެ ގޮތުގައި ހަމަޖެއްސުމުގެ ވިސްނުން މިނިސްޓްރީން ގެންގުޅެމުންދާ ކަމަށެވެ.
