ރައީސް ޔާމީންއަށް ކޮށްފައިވާ ހުކުމަކީ ޣައިރު ގާނޫނީ ހުކުމެއް ކަމަށް ފަނޑިޔާރުންގެ ބެންޗްގެ އަޣްލަބިއްޔަތު ބުނަމުންދާތީ އެ ހުކުމަކީ ބާތިލު ހުކުމެއް ކަމަށް ކަނޑައެޅުމާއެކު މިހާރުން މިހާރަށް ރައީސް އަބްދުﷲ ޔާމީން އެއްވެސް ޝަރުތަކާއި ނުލާ މިނިވަން ކުރުމަށް ގޮވާލާ އިދިކޮޅުން ގަރާރެއް ހުށަހަޅައިފިއެވެ.
ޕްރޮގްރެސިވް ކޮންގްރެސް ކޯލިޝަންގެ ލީޑަރޝިޕުގެ ފަރާތުން ހުށަހަޅާފައިވާ ގަރާރުގައި ބުނެފައިވަނީ، ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން ކޮށްފައިވާ ހުކުމަކީ ޣައިރު ގާނޫނީ ހުކުމެއް ކަމަށް އެ ކޯލިޝަނުންނާއި ދިވެހި ރައްޔިތުންގެ ތެރެއިން ގިނަ ބަޔަކު ދަނީ ބުނަމުން ކަމަށެވެ. އަދި މިއަދު އާއްމުވެފައިވާ އޯޑިއޯތަކަކުން އެމައްސަލަ ބެއްލެވި ފަނޑިޔާރުންގެ ބެންޗްގައި ހިމެނިވަޑައިގަންނަވާ 3 ފަނޑިޔާރަކު އެހުކުމަކީ ގަދަބާރުން އެ ފަނޑިޔާރުންނަށް ބިރު ދައްކާ ނުފޫޒު ފޯރުވާ ރަހީނުކޮށްގެން އަދި އޮޅުވާލައިގެން ކުރެވިފައިވާ ހަމަ ހަގީގަތުގައިވެސް ނުހައްގު ހުކުމެއް ކަމަށް އެފަނޑިޔާރުންވެސް ގަބޫލު ކުރާކަން މިއަދު ވަނީ ރައްޔިތުންނަށް ހާމަވެ ސަރުކާރު ފަލީހަތްވެފައި ކަމަށް ބުނެފައިވެއެވެ.
