ކްރިއޭޓިވް އާރޓް މާއްދާ ގްރޭޑް 1ގެ ދަރިވަރުންނަށް ކިޔަވައިދިނުމުގައި ދަރިވަރުންގެ ފޮތެއް ނޯންނާނެ ކަމަށް މިނިސްޓްރީ އޮފް އެޑިއުކޭޝަނުން ބުނެފިއެވެ.
އެ މިނިސްޓްރީން ކުރި ޓުވީޓެއްގައި ބުނެފައިވަނީ ގްރޭޑް 1ގެ މުގައްރަރުތައް އިސްލާހުކޮށްފައިވާތީ 2021 ގެ ދިރާސީ އަހަރު ގްރޭޑް 1 ގައި ކިޔަވައިދިނުމަށް ހަމަޖެހިފައި ވަނީ، ގެނެވުނު އިސްލާހާ އެއްގޮތަށް ތައްޔާރުކޮށްފައިވާ އާ ފޮތް ބަޔަކުންނެވެ. އެގޮތުން މި ހިނގާ ދިރާސީ އަހަރާއި، ކުރިއަށް އޮތް އަހަރުތަކުގަިއވެސް ގްރޭޑް 1 ގައި ކިޔަވާ ދަރިވަރުންނަށް ކްރިއޭޓިވް އާރޓް ކިޔަވައިދިނުމަށް ބޭނުން ކުރުމަށް ހަމަޖެހިފައިވަނީ މުދައްރިސް ބޭނުން ކުރުމަށް ތައްޔާރުކޮށްފައިވާ މުދައްރިސުންގެ ފޮތަކާއި، ކުރެހުމުގެ ނަމޫނާ ދެއްކުމުގެ ގޮތުން ކްލާހުގައި ހާއްސަކޮށް ގްރޫޕުތަކުގައި ބޭނުން ކުރުމަށް ތައްޔާރުކޮށްފައިވާ ސައިޒުގެ ގޮތުން ބޮޑު ހާއްސަ ރެފެރެންސް ފޮތެއް ކަމަށް އެޑިއުކޭޝަނުން ހާމަކުރެއެވެ.
މި ފޮތް ބޭނުން ކުރުމަށް ހަމަޖެހިފައިވަނީ 5 ދަރިވަރުންގެ ގުރޫޕުތަކުގައި ކަމަށްވެސް އެޑިއުކޭޝަންގެ ބަޔާނުގައިވެއެވެ. އަދި މިގޮތަށް ކަނޑައަޅާަފއިވަނީ މި މާއްދާ އަކީ އެހެން މާއްދާތަކާއި ހިލާފަށް މާއްދާގެ ފަންނީ ހުނަރު ތައް ތަރައްގީ ކުރުމަށްޓަކައި ގިނަ އަމަލީ މަސައްކަތްތަކެއް ކުރުމާ ފަންނީ މާއްދާއަކަށް ވާތީ ކަމަށް ވެސް އެ މިނިސްޓްރީން ހާމަކުރެއެވެ.
