ފަނޑިޔާރުންގެ ލީކުވެފައިވާ އޯޑިއޯ ތަކުގެ މައްސަލައިގެ ހަގީގަތް އޮޅުވާލުމަށްޓަކައި ފަނޑިޔާރުނންނަށް ބިރުދައްކާ ނުފޫޒު ފޯރުވުމުގެ ގޮތުން ޖޭ. އެސް. ސީ އިން މަސައްކަތް ކުރަމުންދާ ކަމަށް ޕީޕީއެމް ޕީއެންސީ ކޯލިޝަނުން ތުހުމަތުކޮށްފިއެވެ.
އެ ކޯލިޝަނުން ނެރުނު ނޫސްބަޔާނެއްގައި ބުނެފައިވަނީ، ރައީސް ޢަބްދުﷲ ޔާމީން އަބްދުލްގައްޔޫމަށް ކްރިމިނަލް ކޯޓުން ކޮށްފައިވާ ޙުކުމަކީ ސަރުކާރުގެ ފަރާތުން ފަނޑިޔާރުންނަށް ވަރަށް ބޮޑަށް ސިޔާސީ ނުފޫޒު ފޯރުވާ ބިރު ދައްކާ ރަހީނުކޮށްގެން ކޮށްފައިވާ ޙުކުމެއް ކަމަށް ފަނޑިޔާރުން އެއްބަސްވާ އޯޑިއޯ އާއި ގުޅިގެން ޖުޑީޝަލް ސަރވިސް ކޮމިޝަނުން ކަން ކުރަމުން ގެންދާ ގޮތާމެދު އެކޯލިޝަނުން ކަންބޮޑުވާ ކަމަށެވެ. އަދި އެ އޯޑިއޯ ތަކަކީ އެއްވެސް އަސްލެއް ނެތް އޯޑިއޯ ތަކެއް ކަމަށް ދެއްކުމަށްޓަކައި އެ ފަނޑިޔާރުންނަށް އިތުރަށް ބިރު ދައްކާ ސިޔާސީ ނުފޫޒު ފޯރުވުމަށް ކުރަމުން ގެންދާ މަސައްކަތް އެންމެ ހަރުކަށި އިބާރާތުން ކުށްވެރި ވަނީ ކުށްވެރިކޮށްފައެވެ.
އެބަޔާނުގައި ބުނެފައިވަނީ ލީކުވެފައިވާ އޯޑިއޯ ތަކުން ރައީސް ޢަބްދުﷲ ޔާމީން ޢަބްދުލްޤައްޔުމަށް ކްރިމިނަލް ކޯޓުން ޙުކުމް ކުރި ބެންޗުގައި ހިމެނޭ ފަނޑިޔާރުން ކޮމްޕްރޮމައިޒްވެ އެ ފަނޑިޔާރުންގެ ނަޒާހަތްތެރިކަމާ މެދު ސުވާލު އުފެދޭ ކަންކަން ހިނގާފައިވާ ކަން ވަނީ ފާހަގަވެފައި ކަމަށާއި ހަމައެއާއެކު އެމަނިކުފާނާއި ދެކޮޅަށް ހެކި ބަސް ދީފައިވާ ބޭފުޅަކުވެސް، އެމަނިކުފާނާއި ދެކޮޅަށް ހެކިބަސް ދީފައިވަނީ ސިޔާސީ ނުފޫޒު ފޯރުވައިގެން ކަމަށް ބުނާ އޯޑިއޯއެއްވެސް ވަނީ ލީކުވެފައި ކަމަށެވެ. އެހެން ކަމުން ފަނޑިޔާރުންގެ އޯޑިއޯގެ މައްސަލަ ބަލަނީ ކަމަށް ބުނެ، އެ ފަނޑިޔާރުންނަށް އިތުރަށް ބިރު ދައްކާ ރަހީނުކޮށް، ސިޔާސީ ނުފޫޒު ފޯރުވުމަށް ޖުޑީޝަލް ސަރވިސް ކޮމިޝަންގެ މެންބަރުން ހިންގަމުން ގެންދާ ހަޑިމުޑުދާރު ޖަރީމާ މިހާރުން މިހާރަށް ހުއްޓާލާ، އެ ފަނޑިޔާރުންގެ މައްސަލަ ތަހުގީގު ކުރާނަމަ މިނިވަންކަމާއި އިންސާފުވެރިކަމާއެކު ހާމަކަން ބޮޑު ގޮތެއްގައި އެ ތަހްގީގު ހިންގުމަށް އެ ބަޔާނުގައި ވަނީ ގޮވާލާފައެވެ. ހަމައެއާއެކު، އެ ޙުކުމް ކޮށްފައިވާ ފަނޑިޔާރުން އެމަނިކުފާނަށް ޙުކުމްކޮށްފައިވަނީ، އެ ފަނޑިޔާރުންގެ ނަޒާހަތްތެރިކަން ގެއްލިގެން ތިބެކަމަށް އަމިއްލަ އިއުތިރާފުން އެއްބަސްވެފައިވާތީ، ރައީސް ޢަބްދުﷲ ޔާމީން ޢަބްދުލްޤައްޔޫމަށް ކްރިމިނަލް ކޯޓުން ކޮށްފައިވާ ޙުކުމް މުރާޖަޢާކޮށް، މިހާރުން މިހާރަށް ބާޠިލުކޮށް ރައީސް ޔާމީން މިނިވަން ކުރުމަށްވެސް ގޮވާލާފައިވެއެވެ.
