އިދިކޮޅު ޕްރޮގްރެސިވް ކޮންގްރެސް ކޯލިޝަނުގެ "އައްޑަނަ" ޖަލްސާ ފަށައިފިއެވެ.
އަލިމަސް ކާނިވަލުގައި މި ޖަލްސާ މިރޭ 9 ޖެހިއިރު ފަށާފައިވަނީ ޕީޕީއެމް ޕީއެންސީގެ ގިނަ އަދަދެއްގެ ސަޕޯޓަރުންނާއެކު އެވެ. އިދިކޮޅު ފަރާތްތަކުން މިފަދަ ޖަލްސާއެއް ބާއްވަމުން މިދަނީ ގިނަ ބަޔަކު އެއްވެގެން މިފަދަ ޖަލްސާއެއް ނުބާއްވާތާ ގިނަ ދުވަސްތަކެއް ފަހުންނެވެ. މިޖަލްސާގައި ޕީޕީއެމް ޕީއެންސީ ކޯލިޝަނުގެ ކުރީ ސަފުގައި ހިމެނިވަޑައިގަންނަވާ ގިނަ ފަރާތްތަކެއް ދަނީ ބައިވެރިވަމުންނެވެ. ކޮވިޑް19ގެ ބަލިމަޑު ކަމާ ގުޅިގެން ގިނަ ބަޔަކު އެއްވެ އުޅޭ ހަރަކާތްތައް ބޭއްވުން މަނާ ކޮށްފައި އޮތް ނަމަވެސް މިހާރު ވަނީ މާލެ ސަރަހައްދުގައި އިއުލާންކޮށްފައިވާ ކާފިއު އުވާލާފައެވެ.
އިދިކޮޅު ފަރާތްތަކުން ޖަލްސާއެއް ކުރިއަށް ގެންދަމުން ދާއިރު އިދިކޮޅު ލީޑަރު ކުރީގެ ރައީސް އަބްދުﷲ ޔާމީން މިވަގުތު ގެންދަވަނީ ފަސް އަހަރު ދުވަހެއްގެ ޖަލު ހުކުމެއް ތަންފީޒު ކުރަމުންނެވެ. ނަމަވެސް މިވަގުތު އެމަނިކުފާނު ހުންނެވީ ގެ ކޮޅުގައެވެ.
