ސުކޫލް ދަރިވަރުންގެ ގުރުއާން ފޮތްތަކުން ފާހަގަވެފައިވާ ކުށްތަކަކީ މީގެ އަހަރުތަކެއް ކުރީގައިވެސް އެފޮތްތަކުގައި ހުރި ކުށްތައް ކަމަށް މިނިސްޓަރ އޮފް އެޑިއުކޭޝަން އާއިޝަތު އަލީ ވިދާޅުވެއްޖެއެވެ.
މިމައްސަލައާއި ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ ވިދާޅުވީ ކުށްތައް ހުރި ފޮތްތަކަކީ އެން އައި އީން ބަލާ ފާސްކޮށް އަދި މިނިސްޓްރީ އޮފް އިސްލާމިކް އެފެއަރޒުން ވެސް ބެލުމަށްފަހު ޕްރިންޓް ކޮށްފައިވާ ފޮތްތައް ކަމަށެވެ.
އަދި މިހާރު ކުރިއަށްދާ މަސައްކަތަކީ ދަރިވަރުން އަތުން ފޮތްތައް ނަގާ އެ ސަފްހާ ބަދަލު ކުރުމުގެ މަސައްކަތް ކަމަށާއި ގްރޭޑް 2 އެއްގެ ފޮތް އެއީ 2015 އިން ފެށިގެން ބޭނުން ކުރަމުން އައި ފޮތް ކަމަށް މިނިސްޓަރ ވިދާޅުވިއެވެ. އަދި އެފޮތަށް ބަދަލެއް ނުގެނެސް މިއަދާ ހަމައަށްވެސް ކިޔަވައިދެމުން ދާއިރު ގްރޭޑް 12 ގެ ފޮތް އެއީ 2018ގެ އޮކްޓޯބަރު މަހު ފާސް ކުރި ފޮތެއް ކަމަށާއި އެފޮތްތަކަށް ހަދަންވީ ގޮތް އަންނަނީ ބެލެނިވެރިންނަށް ކިޔައިދެމުން ކަމަށް މިނިސްޓަރ ވިދާޅުވިއެވެ.
އެޑިއުކޭޝަން މިނިސްޓަރ ވިދާޅުވީ، މިހާރަށްވުރެ ބޮޑަށް ޕްރޫފް ރީޑް ކުރުމުގެ މަރުހަލާ ހަރުދަނާކޮށްފައިވާ ކަމަށާއި މިފަދަ ކަމެއް ދެން ތަކުރާރު ނުވާނެ ގޮތަށް މިހާރު ބޮޑެތި ބަދަލުތަކެއް ގެނެސްފައިވާ ކަމަށެވެ.
މިމައްސަލަ ދިމާވި ގޮތާއި ގުޅޭގޮތުން ވާހަކަދައްކަވަމުން އެންއައިއީގެ ފަރާތުން އަބްދުﷲ ރަޝީދު ވިދާޅުވީ، ދެ ފޮތެއްގައި ގުރުއާންގެ އާޔަތްތަކުގައި މައްސަލަ ޖެހިފައިވަނީ މީގެ އަހަރުތަކެއް ކުރިން ނެރުނު ފޮތްތަކެއް ކަމަށާއި އެއިރު އިސްލާމިކް މިނިސްޓަރަކަށް ހުން ޑރ މުހައްމަދު ޝަހީމް އަލީ ސައީދު ކަމަށެވެ. އަދި އެ ކުށްތައް ނުފެނި މިއަދާ ހަމައަށްވެސް ޕްރިންޓްވަމުން އަންނަނީ ކަމަށް އޭނާ ވިދާޅުވިއެވެ.
