ފޮތްތަކުގައި ހުރި މައްސަލަތައް ދިމާވި ގޮތް ދެނެގަތުމަށް އެކުލަވާލި ކޮމިޓީގެ މަސައްކަތް ފަށައިފިއެވެ.
މިނިސްޓްރީ އޮފް އެޑިއުކޭޝަނުން ބުނީ، ދަރިވަރުންނަށް ކިޔަވައިދިނުމަށް ތައްޔާރުކޮށްފައިވާ އިސްލާމް އަދި ގުރްއާން ފޮތްތަކުގައި ހުރި މައްސަލަތައް ދިމާވާން މެދުވެރިވި ގޮތް ދެނެގަތުމަށް އެކުލަވާލެވުނު ކޮމެޓީގެ މަސައްކަތް މިއަދު ފަށާފައިވާ ކަމަށެވެ.
އެގޮތުން މި ކޮމެޓީގެ މަސައްކަތް ނިންމައި 7 ދުވަހުގެ ތެރޭގައި މިނިސްޓަރަށް ރިޕޯޓު ހުށަހަޅާނެ ކަމަށާއި ރިޕޯޓުގެ ނަތީޖާއަށް ބަލައި ބަދަލު ގެންނަންޖެހޭ ކަންކަމަށް ބަދަލު ގެންނާނެ ކަމަށް އެޑިއުކޭޝަނުން ވަނީ ބުނެފައެވެ.
ސުކޫލް ދަރިވަރުންގެ ގުރުއާން ފޮތްތަކުން ފާހަގަވެފައިވާ ކުށްތަކަކީ މީގެ އަހަރުތަކެއް ކުރީގައިވެސް އެފޮތްތަކުގައި ހުރި ކުށްތައް ކަމަށް މިނިސްޓަރ އޮފް އެޑިއުކޭޝަން އާއިޝަތު އަލީ ވަނީ މީގެ ކުރިން ވިދާޅުވެފައެވެ. ކުށް ހުރިކަމަށް މިހާތަނަށް ފާހަގަވެފަިއވަނީ ގްރޭޑް 1 އަދި ގްރޭޑް 2 އެއްގެ ގުރުއާން ފޮތުގެ އިތުރުން ގްރޭޑް 12ގެ އިސްލާމް ފޮތުގައެވެ.
މިނިސްޓްރީން ބުނެފައިވަނީ މިހާރު ކުރިއަށްދާ މަސައްކަތަކީ ދަރިވަރުން އަތުން ފޮތްތައް ނަގާ އެ ސަފްހާ ބަދަލު ކުރުމުގެ މަސައްކަތް ކަމަށެވެ. އަދި ގްރޭޑް 12 ގެ ފޮތް އެއީ 2018ގެ އޮކްޓޯބަރު މަހު ފާސް ކުރި ފޮތެއް ކަމަށާއި އެފޮތްތަކަށް ހަދަންވީ ގޮތް އަންނަނީ ބެލެނިވެރިންނަށް ކިޔައިދެމުން ކަމަށް މިނިސްޓަރ ވިދާޅުވިއެވެ.
