ދައުލަތުގެ ބެލުމުގެ ދަށުގައިވާ ކުދިން ބަލަހައްޓަން ހުޅުމާލޭގައި ހަދާފައި ހުންނަ ފިޔަވަތީގައި، ކުޑަ ކުދިންތަކަކަށް އަނިޔާކުރި މައްސަލައެއް ހިއުމަން ރައިޓްސް ކޮމިޝަން (އެޗްއާރުސީއެމް) އިން ބަލަން ފަށައިފި އެވެ.
ފިޔަވަތީގައި ތިބި ކުދިންތަކެއް ރޯއަޑު އިވިގެން ރޭ ދަންވަރުގެ ވަގުތެއްގައި އެސަރަހައްދަށް ވަނީ އާންމުންތަކެއް އެއްވެފަ އެވެ. މިމަންޒަރު ފެންނަ ވީޑިއޯއެއް ރޭ އާންމުވިއިރު އެވީޑިއޯގައި ކުޑަކުއްޖަކު ރޯއަޑުވެސް އިވެ އެވެ. މައުލޫމާތު ލިބިފައިވާ ގޮތުގައި އެކުއްޖާއަށް އަނިޔާކުރީ އެތަނުގައި މަސައްކަތްކުރާ މުވައްޒަފުންނެވެ.
މިމައްސަލަ ބަލަމުން ދާކަމަށް އެޗްއާރުސީއެމްއިން ބުނި ނަމަވެސް އިތުރު އެއްވެސް ތަފްސީލެއް ހާމަކޮށްފައެއް ނުވެ އެވެ.
ފުލުހުންނާއި ސުވާލު ދެންނެވުމުން ފުލުހުން ބުނީ އެފަދަ ރިޕޯޓެއް އެ އިދާރާއަށް ހުށަހަޅާފައި ނުވާކަމަށެވެ. އެހެންނަމަވެސް ފިޔަވަތި ހުންނަ ސަރަހައްދަށް މީހުން އެއްވިކަމުގެ މައުލޫމާތު ލިބިގެން ފުލުހުން ދިޔައިރު އެތަނުގައި މީހަކު ނެތްކަމަށްވެސް ފުލުހުން ބުންޏެވެ.
ދައުލަތުގެ ބެލުމުގެ ދަށުގައި ތިބި ކުދިންތަކަކަށް ސަރުކާރު މުވައްޒަފުންތަކެއް އަނިޔާކުރި މައްސަލައެއް ފެންމަތިވިއިރު މިކަމާއި ގުޅިގެން ޖެންޑާ މިނިސްޓްރީން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
