ކުރީގެ ރައީސް މުހައްމަދު ނަޝީދަށް ދިން ހަމަލާ އާއި ގުޅިގެން އިތުރު 3 މީހެއްގެ މައްޗަށް ދައުވާކުރުމަށް ކްރިމިނަލް ކޯޓަށް ފޮނުވައިފިއެވެ.
އެގޮތުން ދައުވާ ކުރަން ޕީޖީ އޮފީހުން ފޮނުވާފައިވަނީ، ގއ. ވިލިނގިލި، ހުދުރުވާގެ، ފަހުމީ އަލީއާއި، އއ. މާޅޮސް، އަސަރީގެ، މުހައްމަދު ނާޒިމްގެ އިތުރުން މ. ކުދެހިގެ، އިސްހާގުގެ މައްޗަށެވެ. ޕްރޮސެކިއުޓަރ ޖެނެރަލްގެ އޮފީހުން ބުނެފައިވަނީ މިއަހަރުގެ މެއި މަހުގެ 6 ގައި ރައީސް މުހައްމަދު ނަޝީދަށް އަމާޒުކޮށްދިން ހަމަލާ އާއި ގުޅިގެން އިތުރު ބައެއްގެ މައްޗަށް ދަޢުވާ ކުރުމަށް މިއަދު ކްރިމިނަލް ކޯޓަށް ހުށަހަޅާފައިވާކަމަށެވެ.
ފަހުމީ އަލީގެ މައްޗަށް ކޮށްފައިވަނީ ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާއެވެ. މުޙައްމަދު ނާޒިމް ގެ މައްޗަށް ކޮށްފައިވާ ދައުވާ އަކީ ޓެރަރިޒަމްގެ އަމަލެއް ކުރުމަށް ރޭވުމެވެ. އަދި އިސްހާގުގެ މައްޗަށް ކޮށްފައިވަނީ ގޮވާ ތަކެތި އެހެން ތަނަކަށް ގެންދިއުމުގެ ދައުވާ ކަމަށް ޕީޖީ އޮފީޙުން ބުނެއެވެ. ރައީސް ނަޝީދަށް ދިން ހަމަލާއާއި ގުޅިގެން މީގެ ކުރިންވެސް 4 މީހެއްގެ މައްޗަށް ދައުވާ އުފުލާފައިވެއެވެ. އެގޮތުން އަދުހަމް އަހުމަދުގެ މައްޗަށް 4 ދައުވާއެއް، މުޖާޒު އަހުމަދުއަށް 2 ދައުވާއެއް، ތަހުމީން އަހުމަދުގެ މައްޗަށް 4 ދައުވާއެއް އަދި އަލީ ހައިޝަމްގެ މައްޗަށް 3 ދައުވާއެއް ވަނީ ޕީޖީން ކޮށްފައެވެ.
