ރާއްޖޭގެ ހާއްސަ އިގްތިސާދީ ކަނޑުގެ ސަރަހައްދަށް ގަވާއިދާ ހިލާފަށް ވަދެ އުޅުނު ބޭރުގެ ދެ މަސް ބޯޓެއް އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެންގޮސްފިއެވެ.
މި ދެ މަސް ބޯޓުގެ ތެރެއިން ފުރަތަމަ ބޯޓު ފެނިފައިވަނީ މިމަހުގެ 11 ވަނަ ދުވަހުގެ 17:55 ހާއިރުއެވެ. އަދި ދެވަނަ ބޯޓު ފެނިފައިވަނީ، މިމަހުގެ 12 ވަނަ ދުވަހުގެ ފަތިހު 05:54 ހާއިރު ކަމަށް އެމްއެންޑީއެފުން ހާމަކުރެއެވެ.
މި މަސް ބޯޓުތައް ހޯދުމަށް އެމްއެންޑީއެފް ކޯސްޓްގާޑުން ކުރިއަށްގެންދިޔަ ހާއްސަ އޮޕަރޭޝަންގައި، އެ ސަރަހައްދުގައި މަސްވެރިކަން ކުރަމުންދިޔަ "އަސުރުމާ 3" ދޯނީގެ ފަރާތުން އެމްއެންޑީއެފް ކޯސްޓްގާޑަށް ވަރަށް ބޮޑު އެހީތެރިކަމެއް ލިބުނު ކަމަށް އެއިދާރާއިން ހާމަކުރެއެވެ.
ސަރުކާރުގެ ކަމާގުޅުން ހުރި މުއައްސަސާތަކާ ގުޅިގެން، ކޯސްޓްގާޑު ޝިޕް ޝަހީދު ޢަލީ ބެލުމުގެ ދަށުން މި ދެ ބޯޓު ވަނީ މިހާރު ހުޅުމާލެ ފަޅަށް ވައްދާފައެވެ.
