ކުއްލި ގޮތަކަށް ގައިދީއަކު ނިޔާވި ހާދިސާގެ ޓައިމްލައިން ހޯމް މިނިސްޓްރީން އާންމުކޮށްފިއެވެ.
ހޯމް މިނިސްޓްރީން ބުނީ ރޭ އިރާކޮޅު ހުޅުމާލޭ ޖަލުގައި ގައިދީއަކު ނިޔާވުމާ ގުޅިގެން އިންސްޕެކްޓަރ އޮފް ކަރެކްޝަނަލް ސަރވިސަސް ގެންދަވަނީ އެމައްސަލަ ތަހުޤީޤު ކުރައްވަމުން ކަމަށެވެ. އަދި ސީީސީޓީވީ ފޫޓޭޖް، ޖަލު އޮފިސަރުން އަދި ގައިދީން ދީފައިވާ މައުލޫމާތުގެ މައްޗަށް ބިނާކޮށް ހާދިސާ ހިނގާދިޔަގޮތުގެ ޓައިމްލައިން އެއް އެ މިނިސްޓްރީގެ ރަސްމީ ޓުވިޓަރ އެކައުންޓުން ވަނީ އާއްމުކޮށްފައެވެ.
ހޯމް މިނިސްޓްރީން ޓައިމް ލައިން އާއްމުކޮށްފައިވަނީ ހުޅުމާލޭ ޖަލުގައި ހުރި ގައިދީއަކު ނިޔާވުމާ ގުޅިގެން އާއިލާއިން ކުރާ ތުހުމަތުތައް ބަލައި މިނިވަން ތަހްގީގެއް ކުރުމަށް ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅާފައި ވަނިކޮށެވެ.
ނިޔާވެފައިވަނީ ތިން އަހަރުގެެ ޖަލު ޙުކުމެއް ތަންފީޒު ކުރަމުންދިޔަ އުމުރުން ސާޅީސް އަހަރުގެ ގދ. ވާދޫ/ ޖަނަވަރީގެ މުޙައްމަދު އަސްލަމްއެވެ.
މިމީހާ ރޭ ގާތްގަނޑަކަށް 6:00 އެހާ އިރު ޔާޑު ސަރަހައްދުގައި އިށީދެގެން އިންދާ ކުއްލިއަކަށް ވެއްޓުމާ ގުޅިގެން ވަނީ އެމަޖެންސީ ހާލަތުގައި ހުޅުމާލެ ހޮސްޕިޓަލަށް ގެންގޮސްފައެވެ. އަދި ހޮސްޕިޓަލުން ބެލުމަށްފަހު އެމީހާ ނިޔާވިކަމަށް ބުނެފައިވަނީ މިރޭ 20:23ގައި ކަމަށް ކަރެކްޝަންސް އިން ވަނީ ހާމަކޮށްފައެވެ.
މުޙައްމަދު އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޛުކުރަމުންދިޔަ މީހެކެވެ. އަދި ނިޔާވިއިރު މީނާއަކީ ބޮޑު ބައްޔަކަށް ބޭސްފަރުވާ ކުރަމުންދިޔަ ފަރާތެއް ނޫންކަމަށް ކަރެކްޝަންސްއިން ވަނީ ބުނެފައެވެ.
