ރައީސް އިބްރާހީމް މުޙައްމަދު ސޯލިހު، އދ ގެ ޢާންމު މަޖިލީހުގެ 76 ވަނަ ސެޝަނުގައި ބައިވެރިވެވަޑައިގެންނެވުމަށް އެމެރިކާގެ ނިއުޔޯކަށް ފުރައިވަޑައިގެންފި އެވެ.
މި ދަތުރުފުޅުގައި ރައީސްގެ އަރިހުގައި އަނބިކަނބަލުން ފަޒްނާ އަޙްމަދާއި ސަރުކާރުގެ މަތީ ފަންތީގެ ވަފުދެއް ބައިވެރިވެ ވަޑައިގަންނަވަނަ އެވެ.
އދގެ ޢާންމު މަޖިލީހުގެ 76 ވަނަ ސެޝަނުގައި ރައީސް ސޯލިހު ތަޤްރީރުކުރެއްވުމަށް ހަމަޖެހިފައި ވަނީ 2021 ސެޕްޓެންބަރ 21 ވާ އަންގާރަ ދުވަހު އެވެ. މީގެ އިތުރުން މި ދަތުރުފުޅުގައި ބައިލެޓްރަލް އަދި މަލްޓިލެޓްރަލް ބައްދަލުވުންތަކާއި ޤައުމު ޤައުމުގެ އިސްވެރިންނާ ބައްދަލުކުރައްވައި މަޝްވަރާތައް ބާއްވަވާނެ ކަމަށް ރައީސް އޮފީހުން ބުންޏެވެ.
އދގެ ޢާންމު މަޖިލީހުގެ 76 ވަނަ ސެޝަނުގެ ރައީސްގެ މަޤާމު މިފަހަރު ދިވެއްސަކު ފުރުއްވަމުން ގެންދަވާކަމީ ރާއްޖެ އދ އާ ގުޅުނުތާ މިވީ ދިގުތާރީޚުގައި ވެސް ރާއްޖެއަށް ނުލިބޭފަދަ މުހިންމު ކާމިޔާބީ އެއްކަމަށް ސަރުކާރުން ދެކެ އެވެ. އެހެންނަމަވެސް ބައެއް ސިޔާސީ ފަރާތްތަކުން ސިފަ ކުރާ ގޮތުގައި ބޮޑު ކެމްޕެއިނެއް ދައުލަތުގެ ހަރަދުގައި ކޮށްގެން ކޮވިޑް-19 ގެ މި ހާލަތުގައި ދިވެއްސަކު އެ މަގާމަށް ގެނައުމަކީ ދެކޮޅު ޖެހޭ ކަމެއް ނޫނެވެ. ފޮރިން މިނިސްޓަރު އަބްދުﷲ ޝާހިދު އދ. ގެ އާންމު މަޖިލީހުގެ ރިޔާސަތަށް ހޮއްވެވުމަށް ދައުލަތުގެ ބަޖެޓުން ވަނީ ދެ މިލިއަނަށްވުރެއް ގިނަ ރުފިޔާ ހަރަދުކޮށްފަ އެވެ.
ރައީސް ސޯޅި އެމެރިކާގެ ނިއުޔޯކަށް ކުރައްވާ މިދަތުރުފުޅު ނިންމަވާލެއްވުމަށްފަހު މާލެ ވަޑައިގެންނެވުމަށް ހަމަޖެހިފައި ވަނީ 2021 ސެޕްޓެންބަރު 28 ވަނަ ދުވަހު އެވެ.
