މާލޭގައި ހުރި އެންމެ ބޮޑު ސިނަމާ، އޮލިމްޕަސް ބަންދުކުރީ ކޮވިޑް-19 ފެތުރެން ފެށުމާއިއެކު މިދިޔަ 2020 ވަނަ އަހަރުގެ ކުރީކޮޅެވެ. އޭރު ރާއްޖޭގެ މަޝްހޫރު އެކްޓަރު އަލީ ސީޒަންގެ "އަނދިރިކަން" ދިޔައީ ސިނަމާގައި ދައްކަމުންނެވެ. އެހެންނަމެސް އެކަށީގެންވާ އަދަދަކަށް ޝޯތައް ނުދެއްކި އުޅެނިކޮށް ސިނަމާއިން ފިލްމު ނަގަން ޖެހުނެވެ. އޭގެ ފަހުން މިއަދާ ހަމައަށްވެސް ސިނަމާ ހުރީ ބަންދުކޮށްފަ އެވެ.
ކޮވިޑް-19 ގައި ގާތްގަނޑަކަށް 6 މަހެއްހާ ދުވަސް ވަރަށް ހާލުގައި އޮވެ މުޅި ރާއްޖެ ވޭތުކުރި އެވެ. މިމުއްދަތުގައި ގިނަ ކަންކަން ވަނީ މުޅިންހެން ހުއްޓިފަ އެވެ. އެހެންނަމަވެސް މި އަހަރުގެ ކުރީކޮޅުން ފެށިގެން ކަންކަން އަނބުރާ އާންމު ހާލަތަށް ރުޖޫއަ ވާން ފެށި އެވެ. ސަރުކާރުގެ އޮފީސްތައްވެސް ހުޅުވައި މުވައްޒަފުން އޮފީހަށް ނިކުންނަން ފެށި އެވެ. އެއާއެކު އޮލިމްޕަސް މަރާމާތު ކުރުމަށް ކަމަށްބުނެ އެ އިމާރާތުގެ ބައިތައް ތަޅައި ހަދަން ފެށި އެވެ.
"ހަމައެމްވީ" އާއި މައުލޫމާތު ހިއްސާކުރި ޕްރޮޑިއުސަރަކު ބުނީ ގިނަ ފިލްމުތަކެއްގެ ޝޫޓިން މުޅިން ނިންމައި ޕޯސްޓުގެ މަސައްކަތްވެސް ނިންމާފައިވާ ޕްރޮޖެކްޓުތައް މިހާރު އެބަހުރި ކަމަށެވެ. އެގޮތުން އެންމެ މަދުވެގެން 7 ނޫނީ 8 ފިލްމުގެ ހުރިހާ މަސައްކަތެއް މުޅިން ނިމިފައިވި ނަމަވެސް އޮލިމްޕަސް ނުހުޅުވާތީ އެޅުވޭނެ ގޮތެއް ނެތިފައިވާކަމަށް އޭނާ ކިޔައިދިނެވެ.
"ރާއްޖޭގަ ސްޓްރީމިން ޕްލެޓްފޯމުތައް އެބަ އޮތް. އެ ތަންތަނަށް ވިއްކޭނެ ގޮތްގޮސްވެސް އެބަހުރި. އެކަމަކު ސިނަމާގައި އަޅުވައިގެން ލިބޭ ވަރުގެ އާމްދަނީއެއް ނުލިބޭ. ފިލްމުގެ ބަޖެޓުވެސް ގިނަ ފަހަރު ކަވަރު ނުކުރެވޭ"
- ޕްރޮޑިއުސަރެއް
އޭނާ މިފަދައިން ވިދާޅުވިއިރު މަސައްކަތް ނިންމާފައި ހުރި ބައެއް ފިލްމުތައް ވަނީ އޯޓީޓީ ޕްލެޓްފޯމުތަކަށް ވިއްކާލައިފަ އެވެ. އަދި ބައެއް ފިލްމުތައް ސީރީޒްއަކަށް ބަދަލުކޮށް އެޕިސޯޑުތަކަކަށް ބަހާލައިގެންވެސް ދަނީ ސްޓްރީމް ކުރަމުންނެވެ. ރާއްޖޭގައި އޯޓީޓީ ޕްލެޓްފޯމުގެ ގޮތުގައި ތިން ޕްލެޓްފޯމެއް އެބަ އޮތެވެ. އެއީ ބައިސްކޯފުގެ އިތުރުން މީޑިއާނެޓު މަލްޓި ސްކްރީނާއި ދިރާގު ޓީވީ އެވެ. ބޮޑު ޑިމާންޑެން އޮންނަނީ ބައިސްކޯފަށާއި މީޑިއާނެޓު މަލްޓި ސްކްރީނަށެވެ.
ރާއްޖޭގެ ފިލްމު އިންޑަސްޓްރީގައި ހަރަކާތްތެރިވާ ގިނަ ފަންނާނުން މީގެ ކުރިން ކްލަބް ހައުސްގައި ވަނީ އޮލިމްޕަސް މައްސަލައިގައި ކަންބޮޑުވުން ފާޅުކޮށްފަ އެވެ. ހާއްސަކޮށް ނެޝަނަލް ސެންޓަ ފޮ ދި އާޓްސް (އެންސީއޭ) އިން މިމައްސަލައިގައި މާ ގިނަ މަސައްކަތްތަކެއް ނުކުރާތީ އެކަންވެސް ފަންނާނުން ފާހަގަކުރެ އެވެ.
"ދެން އަޅުގަނޑުމެން އަމިއްލައަށް މަސައްކަތްތަކެއް ކުރަންވެސް އުޅުނިން. އެކަމަކު ޕްރޮޑަކްޝަން ހައުސްއަކުން ދިޔުމަށްވުރެއް ބޮޑީއަކުން ކަންކަމާ އުޅުން މާ އެފެކްޓިވް ވާނެ ދެއްތޯ. ހަމައެކަނި އޮލިމްޕަހެއް ނޫން. މިސާލަކަށް އިންޑިއާ އާއެކު ނުލާހިކު ގާތް ގުޅުމެއް އުފެދިފައިވާއިރު އެމްބަސީގައި އެދިގެން އިންޑިއާއަށް އެކި ޓްރެއިނިންތަކަށް ފޮނުވަން މަސައްކަތް ކުރެވިދާނެ."
- ރާއްޖޭގެ މަޝްހޫރު ޕްރޮޑިއުސަރެއް
އެންސީއޭގެ އިތުރުން ފިލްމު އެސޯސިއޭޝަން ހަރަކާތްތެރި ނޫން މައްސަލައިގައިވެސް ފަންނާނުން ކަންބޮޑުވުން ފާޅު ކުރެ އެވެ. އެގޮތުން އެސޯސިއޭޝަނުން ފަންނާނުންގެ ކުރިއެރުމަށް މި ވޭތުވެދިޔަ އަހަރުތަކުގައި ކަމެއް ނުކޮށް އޮތް އޮތުން ފަންނާނުން ފާހަގަ ކުރެ އެވެ.
ކޮވިޑް-19 ގެ ސަބަބުން އެންމެ ބޮޑު އަސަރެއް ކުރީ ފަންނާނުންނަށެވެ. ފިލްމީ ދާއިރާގައި މަސައްކަތްކުރާ ފަރާތްތަކުގެ އިތުރުން ލަވަކިޔުންތެރިންނަށްވެސް މެއެވެ. މިހާރު ބައެއް ފިލްމުތަކުގެ މަސައްކަތް އަނެއްކާވެސް ފަށައިގެން ކުރިއަށް ގެންދާއިރު ގިނައީ ސީރީޒްތަކާއި އެންތޮލޮޖީގެ މަސައްކަތްތަކެވެ. އެއީ އޯޓީޓީ ޕްލެޓްފޯމުތަކަށް ކުރާ މަސައްކަތްތަކެވެ.
ފިލްމީ ދާއިރާއަކީ ރާއްޖޭގައި އެންމެ ލަހުން ތަރައްގީވަމުން އަންނަ ދާއިރާއޭ ދެންނެވިދާނެ އެވެ. ހާއްސަކޮށް މީހުން ތަމްރީނު ކުރުމުގައި މިދާއިރާ އުޅެނީ ވަރަށް ފަހަތުގަ އެވެ. ޓެކްނިކަލް ގޮތުން ބޮޑެތި ކުރިއެރުންތަކެއް ހޯދައި މޮޅެތި ފިލްމުތަކެއް ހެދިނަމަވެސް ތައުލީމާއި ތަމްރީނު ލިބިގެން ތިބި ފަންނާނުން ރާއްޖޭގައި ވަރަށް މަދެވެ. ގިނައީ އޮންލައިން އެކި ޕްލެޓްފޯމުތަކާއި ޔޫޓިއުބު މެދުވެރިކޮށް ކަންކަން ދަސްކޮށްގެން ދާއިރާއަށް ނިކުންނަ މީހުންނެވެ. އެކްޓަރުންވެސް ކަންކަން ދަސް ކުރަނީ ކަމުގެ ތެރޭގައި އުޅެގެންނެވެ. އަދި ޑައިރެކްޓަރުންނާއި ޕްރޮޑިއުސަރުން އަދި ތަޖުރިބާ ހުރި އެކްޓަރުންގެ އިރުޝާދުގެ ދަށުންނެވެ. އެއްވެސް ތަމްރީނެއް އަދި ތައުލީމެއް ލިބިގެންނެއް ނޫނެވެ.
އެންސީއޭއިން ފަންނާނުންގެ ތަރައްގީއަށް ކަންކަން ނުކުރާކަމުގެ ޝަކުވާއަކީ މީގެ އަހަރުތަކެއް ކުރީއްސުރެއް އޮންނަ ޝަކުވާއެކެވެ. މިއީ ކޮންމެ ސަރުކާރެއްގައިވެސް އެންމެ ބޮޑަށް އަޅާނުލައި ދޫކޮށްލެވޭ އިންޑަސްޓްރީ އެވެ.
ފަންނާނުން ފާހަގަކުރާ ގޮތުގައި ފިލްމު އިންޑަސްޓްރީ ކުރި ނާރައި އޮތް އޮތުމުގައި ފަންނާނުންގެ މައްސަލަވެސް އެބަ އޮތެވެ. އެގޮތުން ފިލްމީ ދާއިރާގެ ބައެއް ފަންނާނުން އެކަކު އަނެކަކާއިއެކު ގާތް ގުޅުމެއް ނުބޭއްވުމުގެ ސަބަބުން ޓީމެއްގެ ގޮތުގައި މަސައްކަތް ކުރުމުގައި ވަނީ ނުކުޅެދިފަ އެވެ. ހާއްސަކޮށް ޕްރޮޑިއުސަރުންނާއި ޑައިރެކްޓަރުން އެކަކު އަނެކަކަށް އޮންނަ ހަސަދަވެރިކަމެއްގެ ސަބަބުން ދާއިރާ ބައިބައަށް ބެހިގެން ދާކަމަށް ފަންނާނުން ބުނެ އެވެ.
"މީގެ ކުރިން މީޑިއާތަކުގަވެސް ހުންނާނެ އެއް ޑައިރެކްޓަރަކު ވަކި އެއްޗެއް ބުނެގެން އަނެއް ޑައިރެކްޓަރަކު ދާއިރާ ދޫކޮށްލާ ހިސާބަށް ކަންކަން ގޮއްސަ ހުރިތަން. އެންމެންނެއް ނޫން. އެކަމަކު އިންޑަސްޓްރީގަ ވަކިވަކި ޓީމުތަކެއް އެބަ އޮތް. މިހާރުވެސް ފާހަގަ ކުރެވޭނެ ވަކި ޕްރޮޑަކްޝަން ހައުސްތަކުގަ އުޅޭނީ ވަކި އެކްޓަރުން. ދެން މީޑިއާގަ ތަންކޮޅެއް ނުފޫޒު ގަދަ އެކްޓަރުންވެސް އުޅޭނެ. އެކުވެރިކަމެއް ނެތުމަކީވެސް އޮތް ގޮންޖެހުމެއް"
- ރާއްޖޭގެ މަޝްހޫރު ފަންނާނެއް
ގޮންޖެހުންތައް ގިނަ ނަމަވެސް ފަހުގެ އަހަރުތަކުގައި ފިލްމު އިންޑަސްޓްރީގައި މޮޅެތި މަސައްކަތްތަކެއް ކޮށްފައި ހުރުމަކީ ރަނގަޅު ފާލެކެވެ. މިފަހުން ސިނަމާގައި އެޅުވި ބޮޑެތި ގިނަ ފިލްމުތަކުގައި ދިވެހިންގެ އަމިއްލަވަންތަ މޮޅެތި ގޮތްތަކެއް ހުއްޓެވެ. "ގޮށްރާޅު"، "ބަވަތި"، "ނިވައިރޯޅި" އަކީ އޯޑިއަންސަށް ލިބުނު ވަރަށް ބޮޑު ޔަގީންކަމެކެވެ. މިހާރުވެސް މޮޅެތި މަސައްކަތްތަކެއް ކުރަމުން އެބަ ދެއެވެ. އެހެންނަމަވެސް އެ ފިލްމުތައް ފެންނާނީ އޮލިމްޕަސް ހުޅުވުމުން ކަމަށް ބެލެވެ އެވެ. "ކަޅަކި"، "ނީނާ"، "ބަޅިނދު" ފަދަ ފިލްމުތަކުގެ ގިނަ މަސައްކަތްތައް ނިންމާލާފައި އޮތްއިރު މިއިން އެއްވެސް ފިލްމެއް ރިލީޒްކުރާނެ ސީދާ ތާރީހެއް ކަނޑަނޭޅިގެން އުޅެނީ އޮލިމްޕަސް ނުހުޅުވިގެންނެވެ.
އޮލިމްޕަސް ހުޅުވޭނެ ސީދާ ތާރީހެއް އެންސީއޭއިންވެސް ހާމައެއް ނުކުރެ އެވެ.
