އިއްޔެ ބޭއްވި އެމްޑީޕީގެ ގައުމީ މަޖިލީހުގެ އިންތިހާބުގައި އާންމު މެމްބަރުންނަށް ނުފޫޒު ފޯރުވައި ވަކި ގޮތަކަށް ވޯޓުލާން ފައިސާ ދިންކަމުގެ ތުހުމަތު އެމްޑީޕީގެ ކުރީގެ ޗެއާޕާސަން އަދި މި ސަރުކާރުގެ ފުރަތަމަ ޓޫރިޒަމް މިނިސްޓަރު އަލީ ވަހީދު ކުރައްވައިފި އެވެ.
އެމްޑީޕީގެ ތެރޭގައި ދެ ފެކްޝަނެއް އުފެދިފައި އޮއްވައި ބޭއްވި އެތެރޭގެ އިންތިހާބުގައި ކާމިޔާބު ހޯއްދެވީ ރައީސް އިބްރާހިމް މުހައްމަދު ސޯލިހުގެ ފެކްޝަނުންނެވެ. އެގޮތުން އެމަނިކުފާނުގެ ތާއީދު ހޯއްދަވައިގެން ނިކުންނެވި މިނިސްޓަރުންނާއި ސަރުކާރު ކުންފުނިތަކުގެ ވެރިންވެސް ވަނީ ކާމިޔާބު ކުރައްވައިފަ އެވެ.
ރައީސް ނަޝީދުގެ ކެނޑިޑޭޓުންގެ ތެރެއިން ހޮވުނީ ގާތްގަނޑަކަށް 25 އިންސައްތަ ކެނޑިޑޭޓުންނެވެ. މިކަމާއި ގުޅިގެން އަލީ ވަހީދު ކުރެއްވި ޓުވީޓެއްގައި ވިދާޅުވީ ވަޒީފާގެ ބިރު ދައްކައި، އިންތިހާބަށް ނުފޫޒު ފޯރުވައިގެން އަނެއްކާވެސް އެ ހޭވި ހަޑީގެ މުޑުދާރުކަން ފެންނާނީ 2023 ވަނަ އަހަރުގެ ރިޔާސީ އިންތިހާބުގެ ނަތީޖާއިން ކަމަށެވެ.
"23 ގެ އިންތިހާބު ގެއްލުނީމައި މި ދަންނަވާ އެތި ސާފު ވާނެ. އެދުވަހުވެސް، އިއްޔެއާ މިއަދުހެން ޕާޓީގެ އަސާސްތައް މަތީ ދެމި ތިބޭނީ "ހަސަންޓޭ" މެން ފަދަ އިހުލާސްތެރިން"
- އަލީ ވަހީދު
ވަޒީފާގެ ބިރު ދައްކައި ފައިސާގެ ނުފޫޒު ފޯރުވިކަމަށް ސަރުކާރުގެ ބައެއް ބޭފުޅުންނަށް އަލީ ވަހީދު ތުހުމަތު ކުރެއްވިއިރު މި ތުހުމަތު މީގެ ކުރިން އެމްޑީޕީގެ އެހެނިހެން އިސް ބޭފުޅުންވެސް ކުރެއްވި އެވެ. އެގޮތުން ސަރުކާރު ހިއްސާވާ ކުންފުނި ތަކުގައި އާ ވަޒީފާތައް އުފައްދައި ވަޒީފާތަކަށް މީހުން ވެއްދުން އިތުރުވިކަން ފާހަގަކުރެވުނުކަމަށް އެ ބޭފުޅުން ވިދާޅުވި އެވެ.
އިއްޔެ ބޭއްވި އިންތިހަބު ސިފަކުރެވިގެން ދިޔައީ ރައީސް ސޯލިހާއި ރައީސް ނަޝީދާއި ދެމެދު ހިނގައިދިޔަ ހިމޭން ހަނގުރާމައެއްގެ ގޮތުގަ އެވެ. އާންމު މެމްބަރުންގެ މެދުގައިވެސް ތާއީދު ބޮޑުވެގެން ގޮސްފައިމިވަނީ ރައީސް ސޯލިހަށެވެ. މިއީ އެމްޑީޕީގެ ތާރީހުގައިވެސް ރައީސް ނަޝީދާއި ފިކުރީގޮތުން ތަފާތުތަކެއް ހުންނެވި ބޭފުޅަކު އެޕާޓީގެ އެތެރޭގެ އިންތިހާބެއް ކާމިޔާބު ކުރެއްވި ފުރަތަމަ ފަހަރެވެ.
