ވޭތުވެދިޔަ ތިން އަހަރާއި އަޅާ ބަލާއިރު މިއަހަރުގެ މިހާތަނަށް އަރިދަފުސް ރޯގާ ޖެހިގެން ރިޕޯޓްކޮށްފައިވާ އަދަދު ވަރަށް ބޮޑުތަން އިތުރުވެފައިވާ ކަމަށް ހެލްތް މިނިސްޓްރީން ހާމަކޮށްފިއެވެ.
އެގޮތުން އެމިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ އޮގަސްޓްމަހު އެކަނިވެސް ވަނީ 11348 މީހުން އަރިދަފުސް ރޯގާ ޖެހިގެން ރިޕޯޓްކޮށްފައެވެ. މީގެ ތެރޭގައި އޮގަސްޓް މަހުގެ ފަހު ހަފްތާގައި ރިޕޯޓް ކުރި 4246 މީހުންވެސް ހިމެނެއެވެ.
ޖުލައި މަހު އަރިދަފުސް ރޯގާ ޖެހިގެން ރިޕޯޓްކޮށްފައިވަނީ 3838 މީހުންނެވެ. ހެލްތް މިނިސްޓްރީން ބުނީ 2020 ވަނަ އަހަރު ފެތުރުނު ކޮވިޑްގެ ސަބަބުން އެހެން ބަލިތައް ޖެހިފައިވާ މިންވަރު އަދި ރިޕޯޓްކުރެވިފައިވާ މިންވަރުވެސް މަދު ކަމަށެވެ. މީގެ އިތުރުންވެސް ބޭރަށް ހިންގުމާއި ހޮޑުލުމުގެ ރޯގާއެއްވެސް މިދުވަސްވަރު ދަނީ ފެތުރެމުންނެވެ. އެގޮތުން ޖުލައި މަހުވެސް ވަނީ ބޭރަށް ހިންގާ ހޮޑުލެވޭތީ 1208 މީހަކު ޑޮކްޓަރަށް ދައްކާފައެވެ. އަދި އޮގަސްޓް މަހު މިބަލިޖެހިގެން ޑޮކްޓަރަށް ދެއްކި މީހުންގެ އަދަދު ވަނީ އިތުރުވެފައެވެ. އެގޮތުން އޮގަސްޓް މަހު ވަނީ 1358 މީޙުން ރިޕޯޓްކޮށްފައެވެ.
އެހެން ނަމަވެސް މިިދިޔަ ތިން އަހަރާއި އަޅާ ބަލާއިރު ބޭރަށް ހިންގުމާއި ހޮޑުލެވޭތީ މީޙުން ރިޕޯޓް ކުރި އަދަދު އިތުރުވެފައި ނުވާ ކަމަށް ހެލްތުން ހާމަކުރެއެވެ.
