ދިވެހި ދައުލަތުގެ ކޮންމެ މުއައްސަސާއަކުން ވެސް ގާނޫނު އަސާސީ ނަގަހައްޓައި ދަމަހައްޓަންޖެހޭނެ ކަމަށް ކުރީގެ އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ ޝަހީމް ކުރެއްވި ޓުވީޓެއްގައި ވިދާޅުވީ، ދިވެހި ރާއްޖޭގެ ގާނޫނު އަސާސީ އާއި ހިލާފަށް ދާހިލީ މަސްލަހަތު ގެއްލޭ ޒާތުގެ ވާހަކަ ދެއްކުމުގެ ފުރުސަތު އެއްވެސް ފަރާތަކަށް އޮވެގެން ނުވާނެ ކަމަށެވެ.
ޝަހީމް މިހެން ވިދާޅުވެފައި މިވަނީ އިސްލާމް ދީން ނޫން އެހެން ދީންތަކަށް ރާއްޖޭގައި ފުރުސަތު ދީ، ދީނީ މިނިވަންކަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ރައްޔިތުންގެ މަޖިލީހުގައި މިއަދު ގޮވާލާފައިވަނިކޮށެވެ. ޖާބިރު މިފަދައިން ގޮވައިލީ ސަރުކާރުގެ ފަރާތުން މަޖިލީހަށް ހުށަހެޅި ހެއްކާއިބެހޭ ބިލާއި ގުޅޭގޮތުން ކުރިއަށް ދިޔަ ބަހުސްގައި ވާހަކަދައްކަވަމުންނެވެ. ދީނީ މިނިވަންކަމަށް ގޮވައިލަމުން ޖާބިރު ވަނީ ކީރިތި ގުރުއާނުގެ ކާފިރޫން ސޫރަތުގެ ހަތަރުވަނަ އާޔަތް ވިދާޅުވެފަ އެވެ. ޖާބިރު ވިދާޅުވީ ރާއްޖެއަކީވެސް އެހެން ގައުމުތަކެކޭ އެއްގޮތަށް ޔުނިވާސަލް ޕްރެކްޓިސް ކުރެވޭ ތަނެއްގެ ގޮތުގައި ވާންޖެހޭނެ ކަމަށެވެ.
