މެމްބަރުންގެ ރައްޓެހިންނަށް ވީއައިޕީ ލައުންޖް ބޭނުން ކުރެވޭ ކަމެއް ނުދެނަހުރިން މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެއެވެ.
މެމްބަރު ޝަރީފް ކުރެއްވި ޓުވީޓެއްގައި ވިދާޅުވީ، އޭނާ ރާއްޖެއިން ބޭރަށް ދިޔަ އެއްވެސް ދަތުރެއްގައި އޭނާވެސް އަދި އޭނާގެ އާއިލާ ވެސް ދުވަހަކުވެސް އެއަރޕޯޓްގެ ވީއަޕީ ބޭނުން ނުކުރާ ކަމަށެވެ. ރައްޔިތުންގެ މަޖިލީހުގެ މެންބަރުންނާއި މެންބަރުންގެ އާއިލާތަކުގެ އިތުރަށް އެ މެންބަރުންގެ އެކުވެރިންނަށްވެސް ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލައުންޖު ބޭނުންކުރެވޭ ގޮތަށް މަޖިލީހުގެ އާންމު ކޮމިޓީން ފާސްކުރީ މިއަދުއެވެ. މި މައްސަލައާ ގުޅޭ ގޮތުން ރައްޔިތުންގެ މަޖިލީހުގެ އާންމު ކޮމިޓީގެ ބައްދަލުވުމެއް ބާއްވާފައިވަނީ ބުދަ ދުވަހުއެވެ. ނަމަވެސް މިބައްދަލުވުން ބޭއްވީ ސިއްރުންނެވެ.
އޮންލައިން ނޫސް "ދިޔަރެސް"އަށް މައުލޫމާތު ދެއްވި އެމްޑީޕީގެ މެމްބަރަކު ވިދާޅުވި ކަމަށް އެނޫހުން ރިޕޯޓްކޮށްފައިވާ ގޮތުން ބުދަދުވަހު ސިއްރުކޮށްގެން ބޭއްވި ބައްދަލުވުމުގައި ނިންމާފައިވަނީ މެންބަރުންނާއި މެންބަރުންގެ އާއިލާގެ އިތުރަށް އެ މެންބަރަކު އިހުތިޔާރުކުރާ އިތުރު ދެ މީހަކަށްވެސް ލައުންޖު ބޭނުންކުރެވޭނެ ކަމަށެވެ. މި ކޮމިޓީގައި އެމްޑީޕީގެ 8 މެންބަރުން ހިމެނިވަޑައިގަންނަވައެވެ.
