މިއަދު ފާހަގަ ކުރަމުން މިދަނީ އުފާވެރި ޓީޗަރުންގެ ދުވަހެވެ. ޓީޗަރުންގެ ދުވަހެއް ފާހަގަކުރަމުންދާއިރު ޓީޗަރުން ތިބީ ހަމަ ހަގީގަތުގައިވެސް އުފަލުންތޯ މިއީ ހިތަށް އަރާ ސުވާލެކެވެ. މި ސުވާލުގެ ޖަވާބު ހޯދާލުމަށް ބައެއް ޓީޗަރުންނާއި ވާހަކަ ދައްކާލީމެވެ.
ޓީޗަރުންގެ ދުވަހެއް ފާހަގަ ކުރަމުންދާއިރު ޓީޗަރުންނަށް މަސައްކަތް ކުރެވޭނެ މާހައުލެއް ރާއްޖޭގެ ސުކޫލްތަކުގައި ހާއްސަކޮށް އަތޮޅު ތެރޭގެ ސުކޫލްތަކުގައި ގާއިމުކޮށްދޭން ޖެހޭ ކަމަށް ތައުލީމީ ދާއިރާގައި މަސައްކަތް ކުރާ ގިނަ ފަރާތްތައް ގަބޫލު ކުރެއެވެ. މިސާލެއްގެ ގޮތުން އެފަރާތްތަކުން ފާހަގަ ކުރަނީ ސުކޫލްތަކުގައި ހުންނަ ސްޓާފް ރޫމްތަކުގައި މަސައްކަތް ކުރަންޖެހޭ ދަތިހާލެވެ. އެންމެ ކޮމްޕިއުޓަރ ސިސްޓަމަކުން ދިހަ މީހުން މަސައްކަތް ކުރަންޖެހެއެވެ. ލެޕްޓޮޕް ހިފައިގެން ގޮސް މަސައްކަތް ކުރާނަމަ ވައިފައި ނުލިބުމުގެ ދަތިތައް އެތައް ބައިވެރެވެ.
ޓީޗަރުން ގަބޫލުކުރާ ގޮތުގައި މިފަދަ ދުވަހެއްގައި ޓީޗަރުންނަށްޓަކައި ކަމާބެހޭ މުއައްސަސާތަކަށް ކޮށްދެވޭނެ އެންމެ މުހިންމު މަސައްކަތަކީ މަސައްކަތް ކުރެވޭނެ ރަނގަޅު ޖާގަ ތަނަވަސް މާހައުލެއް ގާއިމުކޮށްދިނުމެވެ. އޮންލައިން ފޯމްތައް ފުރުމާއި ކަންކަން ގިނައިރު ސިސްޓަމްއެއް ލިބޭނެ ކަމުގެ ކިޔޫގައި އިންނަން ޖެހޭ ވަގުތު ގިނަ ކަމުން ބޭކާރު ގޮތުގައި އެތައް އިރެއް ހޭދަވެއެވެ.
ޓީޗަރުންނަކީ އޯޓީއެއް ލިބޭ ބައެއް ނޫނެވެ. ޓީޗަރުންނަކީ މެންޑޭޓްގައި ހުރިހާ ކަމެއް އޮވެގެން މަސައްކަތް ކުރަންޖެހޭ ޒިންމާ ބޮޑު ބައެކެވެ. އޯޓީއެއް ނުދެއޭ ކިޔާފައި ކުދިންގެ ފޮތްތައް މާރކު ނުކޮށް ނުތިބެވޭނެތާއެވެ. ކިޔަވައިދޭން ކްލާހަށް ނުގޮސް ނުތިބެވޭނެތާއެވެ.
މާސްޓަރސް ހެދިއަސް ޓީޗަރަކަށް ލިބޭ މުސާރަ 15،000 ރުފިޔާ ނުޖެހޭ ކަމީ އަބަދުވެސް ޓީޗަރުން ކަންބޮޑުވާ މައްސަލައެކެވެ. ކޮންމެ ވެރިކަމެއްގައިވެސް މޮޅު ވައުދުތައް ވާކަން ޓީޗަރުންނަށް އެނގެއެވެ. ނަމަވެސް ވެރިކަމުގެ ފަސް އަހަރު ނިމޭ އިރުވެސް ޓީޗަރުންގެ މުސާރައަށް ހަމަ އެއްގޮތެއްވެސް ނުވެއެވެ. ބައެއް ޓީޗަރުން ގަބޫލު ކުރާ ގޮތުގައި ކޮންމެ ވެރިކަމަކާއެކު އެޑިއުކޭޝަން ސިސްޓަމަށް ވައުދުތައް ފުއްދަން ގެންނަ ބަދަލު ކަމަކު ނުދެއެވެ. ބައެއް ސުކޫލުތަކުގެ ވެރިންނަށް ލާފައި ތިބެނީ ކުލަ ޖެހިފައި ތިބޭ މީހުން ކަމަށްވުމާއެކު
ކޮންމެ ސުކޫލަކުންވެސް ބަލަނީ ކަމެއް ކަމެއް ކުރަންށެވެ. އެހެންވީމާ ވާ ގޮތަކީ ސުކޫލް ހިންގުމުގެ ކަންކަމަށްވުރެ ސޯޝަލް މީޑިއާއަށް ލާންޖެހޭ ފޮޓޯ ގިނަ ކަމުން ދެއްކުންތެރިކަން މާ ބޮޑީއެވެ.
މިއީ ޓީޗަރުންގެ އާދޭހެވެ. ޓީޗަރުންގެ ދުވަހެއް ފާހަގަކުރާއިރު ޓީޗަރުން ހެއްވާލަން އެބަޖެހެއެވެ. ހެޔޮނުވާނެ! ޓީޗަރުންނަށް ކަމެއް ކޮށްދެންޏާ އެމީހުންގެ މުސާރާއަށް ކޮންމެވެސް ބަދަލެއް ނަމަވެސް ގެނެސްދޭށެވެ. އޭރުން ތީޗަރުން އުފާވާނެއެވެ.
