ޖަލުން ނިކުންނަ މީހުން މަހެއްހައި ދުވަހުގެ ތެރޭގައި އަލުން ބަންދަށް ގެންދަންޖެހޭ ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
2019 ވަނަ އަހަރުން ފެށިގެން ހދ ނޭކުރެންދޫގައި ހޯމް މިނިސްޓްރީގެ ބެލުމުގެ ދަށުން ގާއިމު ކުރުމަށް ނިންމާފައިވާ ކަރެކްޝަނަލް ސެންޓަރު އެޅުމަށް މިހާތަނަށް ކުރެވިފައިވާ އަމަލީ މަސައްކަތަކީ ކޮބާތޯ މަކުނުދޫ ދާއިރާގެ މެމެންބަރު މުހައްމަދު ރާއީ މިއަދު މަޖިލީހުގައި ކުރެއްވި ސުވާލަކަށް ޖަވާބުދައްވަމުން ހޯމް މިނިސްޓަރ ވިދާޅުވީ، ޒުވާނުން ޖަލުގައި ހޭދަކުރާ މުއްދަތުގައި ރިހެބިލިޓޭޝަން ޕްރޮގްރާމާއި ވޮކޭޝަނަލް ޕްރޮގްރާމްތައް އެކަށީގެން ވާ ރަނގަޅު ފެންވަރަކަށް ނުހިންގުމުގެ ނަތީޖާއެއްގެ ގޮތުން، ޖަލުން ނިކުންނަ ކުދީން މަހެއްހައި ދުވަހުގެ ތެރޭގައި އަލުން ބަންދަށް ގެންދަން ޖެހޭ ސަބަބުތަކެއް މެދުވެރިވާ ކަމަށެވެ.
އެހެންކަމުން ސަރުކާރުން މިހާރު ވިސްނާފައިވާ ގޮތަކީ އޯޕަން ޕްރިޒަންސް ކޮންސެޕްޓްގައި އައު ޖަލެއް ހަދައި، ޖަލުގެ އިހުސާސް ނުކުރެވޭ ގޮތަށް އެތަނުގައި ރަނގަޅު ޕްރޮގްރާމްތަކެއް ހިންގުން ކަމަށް އިމްރާން ވިދާޅުވިއެވެ. އަދި އޭރުން އެތަނުގައި އަހަރުތަކެއް ހޭދަކޮށްފައި ނިިކުންނަ ކުދީން ރަނގަޅަށް ރިހިބިލިޓޭޓް ވެ ދުނިޔޭގެ ދިރުއުޅުމަށްޓަކައި ކުރާނެ މަސައްކަތެއް އެކުދީންނަށް ދަސްވެ އޭގެ މައްޗަށް އެމީހުން ދިރިއުޅުން ބިނާކުރާނެ ގޮތްތަކެއް ހޯދައިދެވޭނެ ކަމަށްވެސް މިނިސްޓަރު ވިދާޅުވިއެވެ.
