ހިޔާ މަޝްރޫއުގެ ދަށުން ހަދާފައިވާ ފްލެޓްތަކަށް ދޫކުރާ ކަރަންޓް ކަނެކްޝަން ޗާރޖް ފީ ބަހާލައިގެންވެސް ދެއްކޭނެ ކަމަށް ސްޓެލްކޯއިން ބުނެފިއެވެ.
ސްޓެލްކޯއިން ބުނީ ކުރިންވެސް އެންގިފައިވާ ފަދައިން ހިޔާ ފްލެޓްތަކުގެ ކަނެކްޝަން ޗާޖުގެ ގޮތުގައި 300 ރުފިޔާ ފުރަތަމަ ހަދާ ބިލުގައި ހިމެނިފައިވާނެ ކަމަށެވެ.
އަދި މި އަދަދު ބަހާލައިގެން ދެއްކުމަށް އެދިފައިވާ ފަރާތްތަކަށް އެ ފުރުސަތުވެސް ސްޓެލްކޯއިން ވާނީ ފަހިކޮށްދީފައި ކަމަށެވެ.
ހިޔާ ފްލެޓް ހަދާފައިވާ ހުރިހާ ޓަވަރަކަށްވެސް މިހާރު ކަރަންޓް ދޫކޮށް ނިންމާފައިވާ ކަމަށް ސްޓެލްކޯއިން ހާމަކުރެއެވެ. އަދި ހިޔާ ފްލެޓް ލިބިފައިވާ ފަރާތްތަކުގެ ތެރެއިން ހިދުމަތައް ރަޖިސްޓަރ ކުރުމަށްފަހު، އެކި ސަބަބުތަކާއި ހެދި ކަނެކްޝަން ނުލިބިވާ ފަރާތްތަކަށް ކަނެކްޝަނަށް އެދޭނެ އިންތިޒާމް ވެސް ސްޓެލްކޯއިން ވަނީ މިހާރު ހަމަޖައްސައިފައެވެ.
ސްޓެލްކޯއިން ބުނީ ހިޔާ މަޝްރޫއުގެ 6720 ފްލެޓްގެ ތެރެއިން މިހާތަނަށް ސްޓެލްކޯގެ ހިދުމަތަށް އެދި އެގްރީމަންޓް ހަދާފައިވަނީ 6106 ފަރާތަކުން ކަމަށެވެ. އަދި މީގެ ތެރެއިން 5828 ފްލެޓެއްގެ ވެރިފަރާތުން ވަނީ އެގްރީމަންޓުގައި ސޮއެކޮށްފައި ކަމަށާއި މިވަގުތާ ހަމަޔަށް ހިޔާ ފްލެޓްތަކުގެ ތެރެއިން ސްޓެލްކޯ އާއެކު ސޮއެކޮށްފައިވާ 95 އިންސައްތަ ކަސްޓަމަރުންނަށް ވަނީ ކަނެކްޝަން ގުޅާ ދެވިފައި ކަމަށެވެ.
