މިދިޔަ ހޮނިހިރު ދުވަހު ރާއްޖެއަށް ރެކޯޑް އަދަދަކަށް ފަތުރުވެރިން އައިސްފިއެވެ.
މިއީ ކޮވިޑް19 އާއި ގުޅިގެން ރާއްޖޭގެ ބޯޑަރު ހުޅުވިފަހުން މިހާތަނަށް އެއްދުވަހަކާއި އެންމެ ގިނަ ފަތުރުވެރިން ރާއްޖެއަށް އައި ދުވަސް ކަމަށް ޓުއަރިޒަމް މިނިސްޓްރީން ހާމަކުރެއެވެ. އެގޮތުން ހޮނިހިރު ދުވަހު ވަނީ 6،197 ފަތުރުވެރިން ރާއްޖެ އައިސްފައެވެ.
ކޮވިޑް19 އާއި ގުޅިގެން ރާއްޖޭގެ ބޯޑަރު ހުޅުވާފައިވަނީ 15 ޖުލައި 2020 ގައެވެ. މިއަހަރުގެ މިހާތަނަށް ރާއްޖެއަށް ވަނީ 923،146 ފަތުރުވެރިން ރާއްޖެ އައިސްފައެވެ. މިމަހުގެ ފުރަތަމަ 15 ނިމުނު އިރު 52،284 ފަތުރުވެރިން ވަނީ ރާއްޖެ އައިސްފައެވެ.
ބޯޑަރު ހުޅުވާލި ފަހުން އެންމެ ގިނަ ފަތުރުވެރިން ރާއްޖެއަށް އަންނަމުންދަނީ އިންޑިއާއި އަދި ރަޝިޔާއިންނެވެ. އެގޮތުން އިންޑިއާއިން އެކަނިވެސް މިއަހަރު ވަނީ 211،062 ފަތުރުވެރިން ރާއްޖެ އައިސްފައެވެ. ރަޝިއާއިން ވަނީ 177،321 ފަތުރުވެރިން ރާއްޖެ އައިސްފައެވެ. ޓުއަރިޒަމް މިނިސްޓްރީން ހާމަކުރާ ގޮތުގައި މިއަހަރު ރާއްޖެއަށް އަންނާނެ ކަމަށް ލަފާކުރާ ފަތުރުވެރިންގެ 90 އިންސައްތަ މިހާތަނަށް ހާސިލްކުރެވިއްޖެއެވެ.
