މިނިސްޓްރީ އޮފް ހޯމް އެފެއަރޒްގެ އިހުތިސާސްގެ ތެރެއިން ފުލުހުންގެ މުއައްސަސާ ވަކިކޮށްފިއެވެ.
ހޯމް މިނިސްޓަރަށް ރައީސް އޮފީހުން ފޮނުވި ސިޓީއެއްގައި ބުނެފައިވަނީ، ދިވެހި ފުލުހުންގެ ގާނޫނުގެ ދަށުން އުފައްދާފައިވާ މިނިސްޓްރީ އޮފް ހޯމް އެފެއާޒުގެ ދަށުން ކުރިން ހިގަމުންދާގޮތަށް ހަމަޖައްސާފައިވާ "މޯލްޑިވްސް ޕޮލިސް ސާވިސް" އަކީ ދިވެހި ފުލުހުންގެ ހިދުމަތުގެ ގާނޫނުގެ ދަށުން އުފައްދާފައިވާ "ދިވެހި ފުލުހުންގެ ހިދުމަތް" ކަމުގައި އެ ގާނޫނުގައި ބަޔާން ކުރާތީއާއި، އެ ގާނޫނުގައި ދިވެހި ފުލުހުންގެ ހިދުމަތަކީ ވަކި މިނިސްޓްރީއެއްގެ ދަށުން ހިންގުމަށް ކަނޑައަޅާފައިވާ މުއައްސަސާއަކަށް ނުވާތީ މިނިސްޓްރީ އޮފް ހޯމް އެފެއާޒްގެ ދަށުން މޯލްޑިވްސް ޕޮލިސް ސާވިސް ހިންގަމުން ދާގޮތަށް ހަމަޖައްސާފައި އޮތް އޮތުން މިއަހަރުގެ މާޗު 27 ވަނަ ދުވަހުގެ ފެށިގެން ނިމުމަކަށް ގެނެސްފައިވާ ކަމަށެވެ.
މި ސިޓީގައި މިއަހަރުގެ މާޗް މަހުގެ 27 އޭ ބުނެފައިވީ ނަމަވެސް މި ސިޓީ ރައީސް އޮފީހުން ހޯމް މިނިސްޓްރީ އަށް ފޮނުވާފައިވަނީ މިމަހުގެ 14 ވަނަ ދުވަހުއެވެ. އެހެންނަމަވެސް މި ދެ މުއައްސަސާ ވަކި ކުރުމަށް ސަރުކާރުން އަދި ރަސްމީކޮށް އެއްވެސް އިއުލާނެއް ނުކުރެއެވެ.
މިކަމާ ގުޅޭގޮތުން ރަސްމީގޮތުން އެއްވެސް ފަރާތެއްގެ ބަހެއް އަދި ލިބޭގޮތެއް ނުވެއެވެ.
