ހިޔާ ފްލެޓްތަކަށް ގޭސް ފޯރުކޮށްދިނުމުގެ ވަރުގަދަ ސިސްޓަމެއް ގާއިމުކުރުމަށް މޯލްޑިވް ގޭހާއެކު ހައުސިންގ ޑިވޮލޮޕްމަންޓް ކޯޕަރޭޝަން، އެޗް.ޑީ.ސީން އެއްބަސްވުމެއްގައި ސޮއިކޮށްފިއެވެ.
އެޗް.ޑީ.ސީގެ ފަރާތުން މި އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ ސުހެއިލް އަހްމަދެވެ. މޯލްޑިވް ގޭހުގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ ޝަޒައިލް ސިޔާމެވެ. މިއީ ސޯޝަލް ހައުސިންގ މަޝްރޫއެއްގައި ރާއްޖޭގައި ކުރާ ފުރަތަމަ މަސައްކަތެވެ. މި ސިސްޓަމް ގާއިމު ކުރަނީ ހިޔާ ފްލެޓްތަކަކީ ނިސްބަތުން އުސް އިމާރާތްތަކަކަށްވާތީ، ގޭސް ފުޅި އަރުވާ ބޭލުމުގައި އާއްމު ރައްޔިތުންނަށް ދިމާވެދާނެ ތަކުލީފު ކުޑަކުރުމަށްޓަކާ ކަމަށް އެޗް.ޑީ.ސީން ހާމަކުރެއެވެ.
މީގެ އިތުރުން ލިފްޓުތަކުގައި ގޭސް ފުޅި ގިނަ ފަރާތްތަކަކުން އުފުލުމަކީ އެންމެ ރައްކާތެރިކަމަކަށްނުވާތީ މި ސިސްޓަމް ގާއިމުކުރަނީ ކަމަށް ވެސް އެޗްޑީސީން ހާމަކުރެއެވެ.
މި މަސައްކަތް ކުރުމަށް ހަމަޖެހިފައިވަނީ ކޮންމެ ޓަވަރެއްގެ ތިރީގައި ސްޓޯރޭޖް ޔުނިޓްތަކެއް ގާއިމުކޮށްގެންނެވެ. އަދި މިކަން ކުރެވިގެންދާނީ އެމް.އެން.ޑީ.އެފްގެ ރެގިއުލޭޝަންސްތަކާ އެއްގޮތްވާގޮތުގެ މަތިން ކަމަށް އެޗް.ޑީ.ސީން ވިދާޅުވެއެވެ. މި މަސައްކަތް އަންނަ އަހަރުގެ ދެވަނަ ކުއާޓާގައި ނިންމުމަށް ހަމަޖެހިފައިވާއިރު، މި ހިދުމަތް ދިނުމަށް މޯލްޑިވް ގޭހާއި ހަވާލުކޮށްފައިވަނީ 20 އަހަރު ދުވަހުގެ މުއްދަތަކަށެވެ.
