އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބަޖެޓްގެ ބަހުސް ފަށައިފިއެވެ.
މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި ބަޖެޓްގެ ބަހުސް ފަށާފައިވަނީ އަންނަ ބުދަ ދުވަހު ގެ ރެއާއި ހަމައަށް ޖަލްސާ ކުރިއަށް ގެންދަން ކަނޑައަޅައިފައެވެ. އެގޮތުން މިއަދުގެ ޖަލްސާ ފައްޓަވަމުން ނައިބު ރައީސް އީވާ ވިދާޅުވީ، ގަސްތުކުރައްވަނީ ބަޖެޓްގެ ބަހުސް އަންނަ ބުދަ ދުވަހުގެ ރޭގެ ނިޔަލަށް ކުރިއަށް ގެންދެވުމަށް ކަމަށެވެ.
އެގޮތުން މިއަދާއި އަންގާރަ އަދި ބުދަ ދުވަހުގެ ރޭ ހިމެނޭގޮތަށް މުޅި ދުވަހު މަޖިލީހުގައި ކުރިއަށް ގެންދާނީ ބަޖެޓްގެ ބަހުސް ކަމަށް އީވާ ވިދާޅުވިއެވެ. އަންނަ އަހަރަށް ލަފާ ކުރާ ބަޖެޓްގެ ބަހުސްގައި ބައިވެރިވެވަޑައިގަންނަވަން އެދިވަޑައިގަންނަވާ މެންބަރުން ފުރުސަތަށް އެދިވަޑައިގަތުމުގެ އެންމެ ފަހު ވަގުތަކީ މާދަމާ މެންދުރު 12:00 ކަމަށް ވެސް އީވާ ވިދާޅުވިއެވެ.
މަޖިލީހުގެ އާއްމު ކޮމިޓީން ވަނީ ފާސްކޮށްފައިވާގޮތުން ބަޖެޓް ބަހުސް މަރުހަލާގައި މަޖިލީހުގެ ކޮންމެ މެމްބަރަކަށްވެސް 15 މިނެޓްގެ ފުރުސަތެއް ލިބޭނެއެވެ. މީގެ އިތުރުން ބަޖެޓް ދިރާސާކުރުމަށް ފަހު ކޮމިޓީން ތަޅުމަށް ހުށަހަޅައި ކޮމިޓީ ރިޕޯޓަށް ބަހުސް ކުރާ މަރުހަލާގައި ކޮންމެ މެމްބަރަކަށް ހަތް މިނިޓެގެ ފުރުސަތެއް ދޭ ގޮތަށްވެސް ވަނީ ނިންމައިފައެވެ.
އަދި ބަޖެޓާއި ގުޅޭގޮތުން މެމްބަރުން ފާހަގަ ކުރައްވާ ކަންތައްތަކަށް ޖަވާބު ދެއްވުމަށް ފިނޭންސް މިނިސްޓަރ އިބްރާހިމް އަމީރަށް ޖުމުލަ 45 މިނިޓުގެ ވަގުތެއް ދިނުމަށްވެސް ކަނޑައަޅައިފައިވެއެވެ.
2022 ވަނަ އަހަރަށް ލަފާކޮށް ސަރުކާރުން ވަނީ 36.9 ބިލިއަން ރުފިޔާގެ ބަޖެޓެއް ރައްޔިތުންގެ މަޖިލީހަށް ހުށަހަޅައިފައެވެ.
