ޑޯނިއާ ފްލައިޓް ދުއްވަން ދިވެހިންނަށް، މުސާރަދޭން ބޮޑެތި ވިޔަފާރިންގެ ފަންޑެއް ހެދުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ގޮވާލައިފިއެވެ.
މުސާރަދީގެން ޑޯނިއާ ދުއްވަން ދިވެހިން ޕައިލެޓުން ނަގާނެ ގާބިލްކަން ނެތް ކަމަށް ޑިފެންސް މިނިސްޓަރ މާރިޔާ ދީދީ ވިދާޅުވެފައިވާތީ އެކަމަށް އިޝާރާތް ކުރައްވާ މިއަދު ޓޮމް ކުރެއްވި ޓުވީޓެއްގައި، ބޮޑެތި ވިޔަފާރިވެރިންކަމަށްވާ ވިލާ، ޔުނިވާސަލް، ޗަމްޕާ ބްރަދާސް، ސަން ސިޔާމް އަށް، ޑޯނިޔާ ފްލައިޓާއި ހެލިކޮޕްޓަރު ދުއްވާނެ ދިވެހި ޕައިލެޓުންނަށް މުސާރަ ދެވޭނެ ފަންޑެއް ގާއިމު ކޮއްދެެއްވުމަށް ގޮވާލާފައެވެ. ޓޮމް ވިދާޅުވީ ދައުލަތެއްގެ ތެރޭގައި ވިޔަފާރި ކުރެވޭނީ އެ ދައުލަތެއް އޮވެގެން ކަމަށެވެ.
އަވަށްޓެރި އިންޑިއާގެ ޑޯނިއާ މަތިންދާ ބޯޓެއް ރާއްޖޭގެ އަސްކަރިއްޔާއަށް ހަދިޔާ ކުރުމަށް ރާއްޖެ އާއި އިންޑިއާ އާއި ދެ ގައުމުގެ އަސްކަރިއްޔާގެ ދެމެދުގައި ވެފައިވާ އެއްބަސްވުން ރައްޔިތުންގެ މަޖިލީހުގެ 241 ކޮމިޓީގައި ޕްރެޒެންޓޭޝަނެއްގެ ގޮތުގައި ރޭ ވަނީ ދައްކާފައެވެ.
މި ޕްރެޒެންޓޭޝަން އާއި ގުޅިގެން ކޮމިޓީގެ މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ މާރިޔާ ވިދާޅުވީ އެހެން ގައުމުތަކުގައި ޕައިލެޓުންނަށް ދެވޭ ވަރުގެ ބޮޑު މުސާރައެއް ދިވެހި ޕައިލެޓުންނަށް ދޭ ވަރުގެ މާލީ ގާބިލްކަމެއް ދިވެހި ދައުލަތުގެ ބަޖެޓްގައި މިވަގުތު ނެތް ކަމަށެވެ
