ކައުންސިލްތަކަށް ދޭ ބަޖެޓް ކުޑަކަމުން ލޯކަލް ގަވަރމަންޓް އޮތޯރިޓީ އެލްޖީއޭއިން ކަންބޮޑުވުން ފާޅުކޮށްފިއެވެ.
އަންނަ އަހަރަށް ލަފާކޮށް ސަރުކާރުން މަޖިލީހަށް ހުށަހަޅާފައިވާ ބަޖެޓާއި ގުޅޭގޮތުން ބަޖެޓް ދިރާސާ ކޮމިޓީގައި ވާހަކަދައްކަވަމުން އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް އަހްމަދު ވިދާޅުވީ، 2022 ވަނަ އަހަރަށް ކައުންސިލްތަކަށް ދޭން ކަނޑައަޅާފައިވާ ބަޖެޓުން، ކައުންސިލަށް ގާނޫނުން ލާޒިމް ކުރާ ޒިންމާތައް އަދާ ނުކުރެވޭނެ ކަމަށާއި ރައްޔިތުންނަށް ދޭން ޖެހޭ ހިދުމަތްތައްވެސް ނުދެވޭނެ ކަމަށެވެ.
ކައުންސިލްތަކުގެ ބެލެނިވެރި ފަރާތްކަމުގައިވާ، ލޯކަލް ގަވަރމެންޓް އޮތޯރިޓީން ބުނީ ކައުންސިލުތަކުގެ ރިކަރަންޓް ހަރަދަށް އެކަނި ބްލޮކް ގްރާންޓަށްދޭ ހުރިހާ ފައިސާއެއް ހަރަދުވާނެ ކަމަށެވެ. ކޮމިޓީގައި ވާހަކަ ދައްކަވަމުން އާދަމް ޝަރީފް ވިދާޅުވީ، މިހާރު ސަރުކާރުން ކަނޑައަޅާފައި އޮތް ބަޖެޓުން 100 އަށް ވުރެ ގިނަ ރަށަށް ޕްރޮގްރާމްތައް ހިންގަން ބަޖެޓް ނެތް ކަމަށެވެ. އަދި އަލަށް އިންތިހާބު ކުރި އަންހެނުންގެ ކޮމިޓީގެ މެންބަރުންގެ މުސާރަ ހަމަކުރަންވެސް އުދަނގޫވާނެ ކަމަށް ޝަރީފް ވިދާޅުވިއެވެ.
އާދަމް ޝަރީފު ވިދާޅުވީ، ކުއްލިއަކަށް އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މުސާރަ ބޮޑު ކުރުމުން ވަރަށް ބޮޑު ދަތިތަކެއް ކުރިމަތިވާނެ ކަމަށެވެ. ކުރަން ރާވާފައި ހުރި ގިނަ ކަންތައްތަކެއް ދީފައިވާ ބަޖެޓުން ހަމަޖެއްސުމަކީ ކުރެވޭނެ ކަމެއް ނޫން ކަމަށް އޭނާ ވިދާޅުވިއެވެ.
